طالبانو د ننګرهار مومندره کې د داعش پرضد پیچلي عملیات کړي او ددې ډلې یو قومندان “ابوشیر” یې وژلی دی
د طالبانو استخباراتو اړوند المرصاد ورځپاڼې ویلي، په دغه عملیاتو کې چې پرون یک شنبه (چنګاښ ۱۷مه) د ننګرهار په مومندره کې د داعش خلاف ترسره شوي، ددغه ډلې یو قومندان چې اصلي نوم یې “ذکرالله” او مشهور په ابوشیر و، وژلی دی.
طالبانو ته نژدې رسنیزو سرچینو ویلي چې د ننګرهار ولایت په مومندرې ولسوالي کې د داعش ډلې د پټنځایونو پر ضد عملیات شوي دي.
طالبان د داعش پرضد
طالبان د داعش پرضد په دې دریو کلونو کې تر ټولو سخت او کوټلي ګامونه اخیستي دي، خو له دې سره، سره بیا هم په افغانستان کې داعش ډله فعالیت لري او د برید کولو وړتیاوې یې تر لاسه کړي دي.
د طالبانو حکومت ته یوې نژدې رسنۍ المرصاد ویلي چې ابو شیر د ننګرهار ولایت د اچین ولسوالۍ اوسېدونکی و او په دې ولسوالي کې د داعش د پوځي تشکیلاتو مسوول و.
نور ولولئ: دفاع وزارت: داعش په پاکستان کې زموږ پرضد روزل کېږي
نور ولولئ: المرصاد ورځپاڼه: نیول شوي داعشیان پاکستانیان دي
نور ولولئ: اسلام اباد او واشنګټن: ټي ټي پي او داعش باید وځپل شي
سره له دې چې طالبان وايي، داعش ډله په افغانستان کې ځپل شوې خو د امریکا او روسیې په شمول نړیوال باور لري چې دا ترهګره ډله لا هم سیمې او نړۍ ته ګواښ پېښولی شي.
د طالبانو د حکومت ویاند «ذبیح الله مجاهد» په وروستیو کې ویلي و چې داعش ډله د دوی د ځواکونو له لوري ځپل شوې ده. مجاهد همداراز ویلي«داعش ترهګره ډله هغه پدیده نه ده چې د افغانستان لپاره د مشکلاتو د رامینځته کولو توان ولري، ځینې د داعش د ګواښونو په اړه مبالغه کوي.»
پر طالبانو د داعش مرګوني ګزارونه
داعش ډلې په تېرو دریو کلونو کې د طالبانو مهم مشران په نښه کړي دي. دې ډلې د طالبانو او ددوی امیر ته نږدې کس، د بلخ والي محمد داوود مزمل، د بدخشان مرستیال والي او نور کسان په ځانمرګو او نورو بریدونو کې وژلي دي.
کارپوهان لا هم د داعش ډله د طالبانو لپاره یو سرخوږی بولي، خو طالبان بیا وايي، داعش په افغانستان کې د بریدونو، جلب او جذب توان نه لري.
طالبان د داعش په تمویل او روزنه کې پاکستان او تاجکستان ملامتوي چې دغه دواړه هېوادونه د افغانستان پرضد د داعش ډلې ملاتړ کوي.
خو پاکستان بیا وايي، طالبانو په افغانستان کې تحریک طالبان پاکستان ته ځای ورکړی او له هغه ځایه د پاکستان امنیت ګواښي.
