د کډوالو لپاره د ناروې پلاوی: افغانستان کې ۵۰ سلنه افغانان فقر کې ژوند کوي
د بښنې نړیوال سازمان: له پاکستانه د افغان کډوالو “یو ځايي” اېستل به بشري ناورین وي
د ایران د بشري حقونو او نړیوالو چارو مرستیال عسکر جلالیان خبر ورکړی چې ۱۴۹ زندانیان افغانستان ته انتقال شوي ترڅو د خپلې سزا پاتې موده هلته تېره کړي.
د چهارشنبې په ورځ د جمهوري اسلامي ورځپاڼې د راپور له مخې، دغه زندانیان د طالبانو او ایران ترمنځ د یوې هوکړې پر بنسټ سپارل شوي دي.
ایراني چارواکي وایي چې دغه کسان د سیستان او بلوچستان، سمنان، یزد او هرمزګان په زندانونو کې بندیان وو.
ښاغلي جلالیان د دغو زندانیانو د جرمونو په اړه وویل: «د دې کسانو لویې جرمونه د مخدره موادو سره تړاو لري.»
هغه زیاته کړه چې د ایران د عدلیې وزارت د محکومینو د انتقال کمیټه په راتلونکو پړاوونو کې د ګڼ شمېر بهرنیو اتباعو، په ځانګړې توګه د مالیزیا، پاکستان، ترکیې او افغانستان اتباعو، د خپلو سزاګانو د پاتې مودې لپاره خپلو هېوادونو ته د انتقال لپاره ژمنه ده.
په ایران کې د افغانستان د زندانیانو کره شمېر معلوم نه دی، خو ویل کېږي چې په ایران کې ګڼ شمېر افغان اتباع په زندانونو کې دي.
ایران په تېرو میاشتو کې یو شمېر افغان اتباع د بېلابېلو تورونو په تړاو اعدام کړي دي.
