غلا د لوسیو ارتوبیا لپاره یوه انقلابي استعاره وه، نوموړ هغه کس دی چې د نړۍ تر ټولو لوی بانک یې لوټلی دی

لوسیو ارتوبیا وايي “ما د خلکو د ګټې لپاره بانک لوټ کړ، تاسو دې ته غلا نه شئ ویلای، ځکه یوازې له یوه غریب څخه غلا کول، غلا بلل کېږي.” هغه څوک چې غله لوټ کړي د هغه لپاره ابدي بښنه ده او د بانک لوټول د ذلت نه بلکې د عزت خبره ده.

غلا د لوسیو ارتوبیا لپاره یوه انقلابي استعاره وه، خو وايي دا باید د ټولنیز خیر لپاره ترسره شي نه د خپل ځان لپاره. لوسیو هغه کس و چې د نړۍ تر ټولو لوی بانک یې لوټلی دی.

لوسیو، د ورځې لخوا د کارګر په توګه کار کاوه او په شپه کې به يې جعلکاري کوله. هغه بې سواده و او د ژوند تر پایه د یوه باغي او ډاکو په توګه پاتې شو. لوسیو ارتوبیا په ۱۹۸۰مه لسیزه کې د نړۍ تر ټولو زیات مطلوب او په نښه شوی کس و.

هغه د لسګونو کسانو یوه شبکه درلوده چې د ده تر مشرۍ لاندې یې کار کاوه او هغه اداره کوله. دوی هغه وخت د نړۍ تر ټولو ستر بانک (نېشنل سیټي بانک) چې اوس د Citybank په نوم پیژندل کیږي څخه غلا کړې وه.

دا معلومه نه ده چې هغوی څومره پیسې غلا کړې وې‌ خو د لوسیو په وینا، دا لږ تر لږه ۲۰ میلیونه امریکایي ډالر وو. لوسیو ادعا کړې وه، هغه پیسې په لاتینې امریکا او اروپا کې د حکومتونو سره د جنګیالیو چریکي ډلو د تمویل لپاره کارول شوې وې.

هغه دا ادعا هم کړې وه چې د چريکي عملياتو په اړه يې له چيګوارا سره پر ستراتيژۍ خبرې کړې وې.

دا مالومه نه ده چې د دې خبرو څومره یې رښتیا دي او څومره یې تشې خیالي کیسې دي، خو د دې ټولو تر منځ د لوسیو ارتوبیا ژوند د فلم له کیسې کم نه دی.

هغه به هر هغه څه ته چې اړتیا درلوده غلا کول یې

لوسیو ارتوبیا په کال ۱۹۳۱م کې د کاسکانټ په ښار کې زېږیدلی و. هغه په خپل ژوندلیک کې ویلي: په ماشومتوب کې ما هيڅکله د هغه څه درناوی نه کاوه چې منع شوي وي. که ما یو څه ته اړتیا درلوده، نو د ترلاسه کولو لپاره مې مناسب فکر کاوه.

هغه به د خلکو له بڼونو مېوه غلا کوله او هر هغه څه به یې کول چې د ژوندي پاتې کیدو لپاره ورته اړین وو.

تر کوچنیو او وړو غلاوو وروسته، هغه پر پوله په قاچاقو کې ښکېل شو. د خپل ورور سره یو ځای، هغه د پولې بله خوا تنباکو، درمل او شراب قاچاق کول او کله چې ځوان شو، نو د هغه وخت د قانون له مخې په پوځ کې په جبري توګه شامل شو. دا هغه وخت و چې پوځي بارکونو او ګودامونو ته یې لاسرسی درلود او دلته یوه نوې نړۍ ورته مخې ته راغله.

لوسیو د ۱۹۸۰م په جون کې ونیول شو او سم لاسي زندان ته واستول شو او په ۲۰۲۰م کال کې یې له دې نړۍ سترګې پټې کړې.