د زیاتې مالګې خوړل بدن ته تر نورو خوړو ډېر خطرناک بلل شوي دي
له مالګې پرته خواړه خوند نه کوي، خو که دغه توکی زیات وخوړل شي، نو د زړه، وینې فشار، معدې او نورې ناروغۍ هم در پيدا کولای شي.
څېړنې په ډاګه کوي چې د زیاتې مالګې استعمال یا خوړل پر پورتنیو ناروغیو سربېره ستاسې د معدې تېزاب نور هم زیاتوي او د هغو کسانو چې د معدې تېزاب يې زیات شي، ټول خوراکي مهالوېش ګډوډېږي، ځکه چې د معدې ناروغي د نورو ناروغیو مور ګڼل کېږي.
که مالګه په مکمل ډول پرېښودل شي
څېړونکي وایي، په ټوليز ډول د مالګې له استفادې سره په بشپړه ډول هم مخه ښه مه کوئ، خو په ورځ کې د چای خوړلو یوه کاچوغه چې تر شپږو ګرامو کېږي حتمي وخورئ، خو تر دې زیات او کم یې ناروغي درته پیدا کوي.
څېړونکي وايي، که په ورځ کې تر شپږو ګرامو زیاته مالګه وخوړل شي، نو د معدې په سرطان او ورسره نورو اړونده ناروغیو مو د اخته کېدا چانس زیاتېږي.
بل لورته بيا نورې څېړنې وايي چې مالګه د وینې د فشار لوړولو لامل ګرځي، په تازه مهال کې طبي پوهانو د مالګې د ډېر استعمال یو بل زيان هم په ډاګه کړی دی.
نور ولولئ: د ګیلاس او راسبېري له روغتیایي ګټو خبر یاست؟
نور ولولئ: د مغزي سکتې په مخنیوي کې مرسته کوونکي خواړه
یوې بلې څېړنې ښودلې چې د مالګې ډیر استعمال د فشار پر لوړولو سربېره د ډېر عمر کسانو وینې ته هم خورا جدي زيان رسوي.
د مالګې ګټې کومې دي
په مالګه کې موجود «سوډیم» په نورو چارو سربېره په بدن کې د موجودو اوبو جریان په برابروي او عصبي نظام منظم کوي، خو که دا څه له حد زياته استفاده شي، نو بيا يې زيانونه تر ګټې لوړيږي.
د اړوندې طبي څېړنې له پايلې ثابته شوې چې د انسان لپاره که هره ورځ له شپږو ګرامو زياته مالګه وخوري، د لوړ فشار ناروغي هم ورته پيدا کېدای شي.
د روغتيا د نړيوال سازمان د اړوندو مقرراتو سره سم د لويانو لپاره د مالګې د خوړلو ورځنۍ اندازه بايد په شپږو ګرامو کې وساتل شي، له دې امله چې د ډوډۍ پخولو په وخت کې که خوراکونه زيات چمتو شي، نو هرومرو به د مالګې اندازه په کې لوړيږي او کېدای شي تاسې له اړتيا څخه زياته مالګه وخورئ. بل خوا بيا د مالګې پر کيفيت هم ټينګار کېږي چې د لوړ کيفيت مالګې وکاروئ.
