امریکا –
د ملګرو ملتونو عمومي شورا د افغانستان څوکۍ په تړاو د ځانګړې کومېټې پرېکړه تصویب کړه غلام اسحاقزی پر خپلی څوکۍ پاتې شو د ملګرو ملتونو عمومي شورا په دې سازمان کې د افغانستان څوکۍ د پرځول شوي افغان حکومت استازي غلام اسحاقزي ته د سپارلو په اړه د باور ورکولو ځانګړې کومېټې پرېکړه تصویب کړه.
په ملګرو ملتونو کې د افغانستان استازولۍ له رسمي ټویټر حسابه په یوه پیغام کې ویل شوي د ملګرو ملتونو عمومي شورا د باور اسناد ورکولو کمېټې له اړخ د ملګرو ملتونو عمومي شورا د ۷۶ می دورې لپاره د افغانستان اسلامي جمهوریت استازي ته د باور ورکړل شوی لیک منلی. د یادونې وړ ده چې طالبانو تېره اګست میاشت کې واکمنۍ ته له رسېدو څخه وروسته د خپل سیاسيدفتر پخوانی ویاند سهیل شاهین ملګرو ملتونو کې د خپل استازي په ډول نومولی و.
دا هم ولولئ | طالب چارواکي په کابل کې د متحده عربي اماراتو د سفارت د بیا پرانیستلو خبر ورکړی.
خو د ملګرو ملتونو دې ځانګړې کومېټې تېره چارشنبه پرېکړه وکړه چې په عمومي شورا کې دې د افغانستان څوکۍ د اوس مهال لپاره افغان طالبانو ته نه ورکول کېږي .دا په دې معنی وه چې د افغانستان د پرځول شوي حکومت استازی غلام اسحاقزی به ملګرو ملتونو کې د افغانستان څوکۍ ساتي چې نن دوشنبه د باور کمېټې وړاندیز له مخې رسماً تایید شوه د دې ځانګړې کومېټه کې د امریکا په ګډون روسیې، چین، سویډڼ، بهاماس، بوټان، چیلي، نمیبا او سیري لیون هېوادونو استازي هم شامل دي.
د افغانستان څوکۍ ته د طالبانو نومول شوي استازي سهیل شاهین تېره چارشنبه پر خپله ټوېټر پاڼه لیکلي د افغانستان وګړی حق لري چې یو ازاد هېواد ولري او د دې لپاره یې لسیزې مبارزه هم کړې.
نوموړي زیاته کړی پکار نه ده چې افغانانو باندې بندیزونه ولګول شي او په ملګرو ملتونو کې له خپلې څوکۍ څخه محروم پاتې شي.
