د م.م سرمنشي ګوټېرش ویلي چې د افغان ښځو پر زده کړو لګول شوي بندیزونه باید لرې شي
د ملګرو ملتونو سرمنشي وايي، په افغانستان کې د نجونو او ښځو په زدهکړو او کار لګول شوی ظالمانه محدودیت باید لغوه شي.
د ملګرو ملتونو سرمنشي انټونیو ګوټېرېش وايي، په افغانستان کې د نجونو او ښځو په زدهکړو او کار باید لګول شوي “ظالمانه” محدودیتونه لهمنځه یوړل شي.
انټونیو ګوټېرېش د افغانستان په اړه د دوحې له ناستې یوه ورځ وروسته په خپله ایکسپاڼه لیکلي، افغان نجونې او ښځې باید وکولای شي چې د ژوند په ټولو چارو کې په بشپړ او معناداره توګه په ټولګي کې له چوکۍ تر هغه مېزه چې پرېکړهکوونکي وي، ګډون وکړي.
طالبانو د ښځو پر زده کړو بندیزونه لګولي
د طالبانو حکومت که څه هم چې له شپږم ټولګي پورته تر پوهنتونه د نجونو په زدهکړو بندیز لګولی او د دولتي ادارو په ګډون یې په ټولو غیر دولتي ادارو کې له کار هم منع کړي، خو له دې ټولو سره سره ادعا کوي چې د اسلام په چوکاټ کې یې ښځو ته حقونه ورکړي دي.
نور ولولئ: د دوحې په غونډه کې محبوبه سراج وايي، طالبان ښځو ته سپکاوی کوي
نور ولولئ: راتلونکو دوو ورځو کې، ۲۰ هېوادونو په دوحه کې د افغانستان په تړاو ناسته کوي
نور ولولئ: د م.م سر منشي: د دوحې په ناسته کې پر اړینو مسایلو هوکړې وشوې
د ملګرو ملتونو سرمنشي چې د یکشنبې او دوشنبې په ورځ د افغانستان په اړه په دوحه کې د یوې غونډې کوربه و په خپله ایکسپاڼه دا هم لیکلي چې افغانستان د امنیت د ټینګښت، د فساد د کمولو او پر کوکنارو د بندیز په برخو کې ښه پرمختګ کړی، خو وايي ډېر نور کارونه پاتې دي چې باید و یې کړي.
په دې اړه د نړیوالو هڅو دوام
هغه زیاته کړې، نړیواله ټولنه باید خپلو هڅو ته دوام ورکړي؛ څو دا خبره یقیني کړي چې د ټولو افغانانو حقوق او اړتیاوې پر افغانستان د واکمنو طالبانو د لومړیتوبونو اصلي محور وي.
په ورته وخت کې یو شمېر افغان نجونې او ښځې د طالبانو د رژیم پر وړاندې پر دوی د محدودیتونو او بندیزونو د مخنیوي له امله د عملي اقداماتو په نه کولو د نیوکې ترڅنګ وايي، اړینه ده چې د دې ستونزو د حل لپاره عملي کار وشي.
ګوټېرېش یادونه کوي چې سږکال به هم د افغانستان له نیمایي زیات وګړي بشري مرستو ته اړ وي په داسې حال کې چې دې هېواد ته د مرستو له پلانونو سره تراوسه یوازې څه کم درې سلنه بسپنه اعلان شوې.
د یادونې وړ ده چې طالبانو سره له دومره فشارونه د مېرمنو زده کړو او کار ته اجازه نه ده ورکړي.
