د سویډن حکومت په هغه هېواد کې له افغان سفیره غوښتي چې سفارت دې نور خوشې کړي
په سویډن کې د افغانستان د پخواني نظام سفیر عباس نویان ته د روان میلادي کال تر پایه وخت ورکړل شوی چې له دندې استعفا ورکړي او سفارت دې په رسمي توګه خوشې کړي.
په سویډن کې افغان سفیر عباس نویان د ( لیندۍ ۲۶مه) په سټاکهولم ښار کې یوې غونډې ته ویلي چې د کوربه هېواد د بهرنیو چارو وزارت ورته په رسمي توګه یادونه کړې چې د روان میلادي کال د ډسمبر میاشتې تر وروستۍ نیټې دې خپله دنده پرېږدي او سفارت ته دې نه ورځي.
افغان سفارت باید قونسل ته وسپارل شي
هغه زیاته کړې: « ما ته ویل شوي چې سفارت باید د افغانستان اسلامي جمهوريت قونسل ته وسپارم او تر دې وروسته به یوازې د قونسلي خدمتونو برخه فعاله وي.»
ښاغلي نویان د سویډن حکومت د دغه پرېکړې لامل دا بللی چې ګني د نوموړي د استوګنې ویزه پای ته رسیدلې ده.
نور ولولئ: امیرخان متقي له مسکو مننه کړي چې دوی ته په نړیوالو ناستو کې کمپاین کوي
نور ولولئ: امیرخان متقي هرات کې د ترکمنستان د بهرنیو چارو وزیر سره ولیدل
د افغانستان دغه ډیپلومات وايي، ښايي د سویډن حکومت د دغې پرېکړې تر شا د طالبانو له خوا د هغه لیک تاثیرات اغیزې هم وي چې له مخې یې له لویدیځو هېوادونو څخه غوښتي وو چې د افغانستان په نوم شته ډیپلوماتان له دوی سره رسمیت نه لري.
په سویډن کې یو شمېر افغانان اندېښنه لري چې ښايي دغه سفارت به یا وتړل شي او یا به هم د طالبانو پلویانو ته په واک کې ورکړل شي.
په افغانستان کې د سویډن د مرستندویه ادارو تړل کېدل
سویډن د افغانستان د سفیر کاري موده په داسې وخت کې پای ته رسوي چې طالبانو په افغانستان کې د سویډن کمیټې مرستندویه دفترونه تړلي او ورته د فعالیت اجازه نه ورکوي.
تر دې وړاندې په جرمني او په اروپا کې یو شمېر نورو هېوادونو کې هم د پخواني جمهوري نظام د سفیرانو تر څنګ ډيپلوماتان دې ته اړ کړي چې خپلې دندې پرېږدي.
المان او ناروې هېوادونو بیا د طالبانو سره د جوړ جاړي په پایله کې پرېکړې کړې وې چې په دغو هېوادونو کې سفارتونه د طالبانو غړو یا هم هغه کسانو ته وسپاري، چې په افغانستان کې له واکمنې ډلې سره تعامل کولای شي.
د یادونې وړ ده چې طالبان له دریو کلونو وروسته هم په رسمیت نه دي پېژندل شوي.
