د پنجشیر زمرد؛ څه باندې ۳ زره قیراطه زمرد په څه باندې ۴ میلیونه افغانیو وپلورل شول
د پنجشیر ولایت ځايي چارواکي وايي، د دغه ولایت له کانونو تازه استخراج شوي د پنجشیر زمرد یو ځل بیا د داوطلبۍ له لارې پر سوداګرو پلورل شوي دي.
د پنجشیر د اطلاعاتو او فرهنګ ریاست ویاند سیفالدین لټون ویلي، دا ځل ۳ زره او ۲۰۸ قیراطه د پنجشیر زمرد د کانونو د څارنې کمېټې، سیمهییزو چارواکو او سوداګرو په حضور کې د ازادې داوطلبۍ له لارې وپلورل شول.
د نوموړي په وینا، د دغو زمردو ټولیز ارزښت ۴ میلیونه، ۱۳۹ زره او ۴۰۰ افغانۍ ته رسېدلی دی.
د زمردو پلور د داوطلبۍ له لارې ترسره شو
چارواکي وايي، د زمردو د پلور بهیر د روڼتیا د تأمین لپاره د اړوندو ادارو او سوداګرو په حضور کې ترسره کېږي، څو د قیمتي ډبرو د پلور عواید په منظم ډول راټول شي.
د پنجشیر کانونه د افغانستان له مهمو قیمتي ډبرو لرونکو سیمو څخه ګڼل کېږي او د دغه ولایت زمرد د لوړ کیفیت له امله په کورنیو او نړیوالو بازارونو کې ځانګړی شهرت لري.
د پنجشیر زمردو پلور دوام لري
د پنجشیر د اطلاعاتو او فرهنګ ریاست د معلوماتو له مخې، تر دې وړاندې هم زرګونه قیراطه د پنجشیر زمرد د داوطلبۍ له لارې پر کورنیو سوداګرو پلورل شوي دي.
چارواکي باور لري چې د زمردو منظم استخراج او قانوني پلور کولی شي د کانونو سکټور د عوایدو په زیاتوالي او د سیمې په اقتصادي فعالیتونو کې مهم رول ولوبوي.
