د ښځو نړیوال جام نن پیلېږي؛ ۱۲ لوبډلې د اتلولۍ لپاره سیالي کوي
د ښځو نړیوال جام سیالۍ نن جمعه د انګلستان په کوربتوب پیلېږي او د نړۍ ۱۲ پیاوړې ښځینه کرکټ لوبډلې به د اتلولۍ د ترلاسه کولو لپاره په ډګر کې سیالي وکړي.
د دې نړیوال جام لومړۍ لوبه به د انګلستان او سریلانکا د ښځینه ملي لوبډلو ترمنځ ترسره شي. ټاکل شوې ده چې دغه سیالي د افغانستان پر وخت نن ماښام ۵:۳۰ بجې پیل شي.
د ښځو نړیوال جام کې کومې لوبډلې برخه لري؟
د سیالیو په الف ګروپ کې اسټرالیا، هند، پاکستان، سویلي افریقا، بنګلهدېش او نیدرلنډ شامل دي.
په بي ګروپ کې بیا انګلستان، نیوزیلنډ، ویسټانډیز، سریلانکا، ایرلنډ او سکاټلنډ لوبډلې سیالي کوي.
د کرکټ نړیوالې شورا (ICC) د مهالویش له مخې، ټولې لوبډلې به د ګروپي پړاو له لوبو وروسته د نیمه پایلوبې پړاو ته د رسېدو لپاره سیالي وکړي.
د افغانستان د ښځینه لوبډلې په اړه راپورونه
د رسنیو د ځینو راپورونو له مخې، د افغانستان جلاوطنه ښځینه کرکټ لوبډله هم د د ښځو نړیوال جام له سیالیو سره تړلو پروګرامونو ته بلل شوې ده، خو تر اوسه په دې اړه رسمي او بشپړ جزیات نه دي خپاره شوي.
د ښځو نړیوال جام ولې مهم دی؟
د ښځو نړیوال جام د ښځینه کرکټ تر ټولو ستر نړیوال پړاو ګڼل کېږي چې د نړۍ مخکښې لوبډلې پکې برخه اخلي. دا سیالۍ نه یوازې د اتلولۍ لپاره مهمې دي، بلکې د ښځینه کرکټ د ودې، د نوو استعدادونو د معرفي کولو او د نړیوالو سیالیو د کچې د لوړولو لپاره هم ځانګړی ارزښت لري.
تمه کېږي چې سږنی د ښځو نړیوال جام به د میلیونونو کرکټ مینهوالو پام ځانته واړوي او د ښځینه کرکټ په نړۍ کې به نوې سیالۍ او یادګاري شیبې رامنځته کړي.
