متحده ایالات په پام کې لري چې هغه چورلکې چې تاجکستان ته الوتنې شوې وې، وسپاري
د رویټرز خبري اژانس د رپوټ له مخې، متحده ایالات په پام کې لري هغه چورلکې چې د مخکیني حکومت له پرځېدو وروسته تاجیکستان ته لېږدول شوي دوشنبې ته ورکړي. د امریکا د مرکزي قومندانۍ قوماندان وايي، چې دغه پوځي څرخکې به بېرته افغانستان ته ورنه کړل شي. ځکه چې د طالبانو اړوند نه دي.
د تاجکستان له چارواکو سره د لیدنې لپاره تاجکستان ته ولاړ
د رویټرز خبري آژانس رپوټ ورکړی، چې د امریکا د مرکزي قومندانۍ قومندان تاجیکستان ته په خپل سفر کې له تاجیک چارواکو سره په کتنه کې ویلي دي، چې د افغانستان د مخکیني حکومت د سقوط پر مهال تاجیکستان ته لېږدول شوې څرخکې او الوتکې ښایي دوشنبې ته وسپارل شي.
د امریکا د مرکزي قومندانۍ قومندان جنرال مایکل کوریلا څرګندوي:«ښایي امریکا متحده ایالتونه تاجیکستان ته اجازه ورکړي، چې هغه څرخکې چې د افغانستان اردو ته یې ورکړې وې، او د اګست میاشتې له سقوط وروسته دغه هېواد ته لېږدول شوې دي، له ځان سره وساتي. موږ هیله من یوو چې وکړای شو، ټولې چورلکې یا یې یوه برخه د تاجیکستان دولت ته وسپارو، که څه هم وخت یې څرګند نه دی، خو موږ هڅه کوو چې دغه چورلکې وسپارل شي.»
نور یی ولوله| د افغانستان په هکله د اوسلو مجمع غونډه په ناروې کې جوړه شوه
نور یی ولوله| د کابل پوهنتون ځينې پوهنځۍ د استادانو له کموالي سره مخ دي
د افغانستان د جمهوري نظام د سقوط پرمهال لسګونه پوځي څرخې او الوتکې تاجیکستان او ازبیکستان ته ولېږدول شوې. تاجیکستان او ازبیکستان ته د لېږدول شویو څرخکو شمېر له پنځوسو ډېر بلل شوی دی. د نظامي چارو شنونکی اسد الله ندیم وايي:«د ګرمۍ یوه برخه تېر حکومت ته متوجه دی چې دغه الوتکې یې د مالک په توګه ونه ګڼلې، بلکې د امانتدار په توګه ګڼل شوې دي او د ګرمۍ بله برخه اوسني حکومت ته متوجه ده چې باید تر ټولو مخکې د هغه له څېښتن له هغه کس سره چې سپارښتنه یې کړې ده، یعنې له امریکا سره مذاکره کړې وای.»
تر دې وړاندې اسلامي امارت د تاجیکستان او ازبیکستان له چارواکو سره هېواد ته د پوځي څرخکو د راستنولو په تړاو د خبرو خبر ورکړی و. د اسلامي امارت د ویاند مرستیال بلال کریمي وویل:«د اسلامي امارت چارواکي د هغو موضوعګانو په هکله چې په هېوادونو پورې اړوندې دي، په اړیکه کې دي او په دې هکله د جزیاتو له بشپړېدو وروسته، معلومات شریکېږي.» له دې ټولو سره سره، د تاجیکستان او ازبیکستان چارواکو هم ویلي دي، چې له افغانستانه دغو هېوادونو ته لېږدول شوې څرخکې به اسلامي امارت ته ونه سپاري.
