اړوند خبرونه:
ډاکټر عبدالله عبدالله: پر ایران د اسرائیلو بریدونه نامشروع دي
د ایران د پارلمان رئیس: پر اسراییل برید ‘غاښ ماتوونکی ځواب’ دی
امریکا د اسرائیل پر وړاندې د ایران ګواښونه جدي بللي
د مالیې وزارت وايي، چې د ایران سره د افغانستان پولې او ګمرکونه خلاص دي او د دواړو هېوادونو ترمنځ د سوداګرۍ په وړاندې هېڅ خنډ نشته.
وزارت په یوه اعلامیه کې چې نن (دوشنبه، د جون ۱۶مه) خپره شوه، ویلي چې له ایران سره سوداګري په نورمال ډول او پرته له کومې ننګونې پرمخ ځي.
په ورته وخت کې، د مالیې وزارت زیاته کړه چې د ایران په بندر عباس کې د افغان سوداګریزو توکو بارولو پروسه هم په نورمال ډول روانه ده.
په اعلامیه کې ویل شوي: “د ایران په اسلامي جمهوریت بندر عباس کې د افغان سوداګریزو توکو بارول په نورمال ډول او پرته له کومې ستونزې دوام لري.”
د یادولو ده چې د جون په ۱۴مه، د فراه او نیمروز ولایتونو د ابو نصر فراهي ګمرک او د ایران لوري ته ګمرکونه په هغه هېواد کې د ځینو مراسمو د ترسره کېدو له امله تړل شوي وو، خو نن بیرته پرانستل شوي او د پخوا په څېر فعالیت کوي.
دا په داسې حال کې ده چې په تېرو دوو ورځو کې، په منځني ختیځ کې د کړکیچونو د زیاتوالي وروسته، د هېواد یو شمیر اتباعو د تېلو د بیو د لوړېدو په اړه اندیښنه څرګنده کړې او له حکومت څخه یې غوښتي چې د بیو کنټرول ته ډیره پاملرنه وکړي.
