اړوند خبرونه:
د افغانستان سرپل ولایت کې هره ورځ د ۹۰۰ټنه نفتو استخراج
شهاب الدین دلاور: چنايي شرکت ته هله کانونه ورکوو چې افغانستان کې پروسس وکړي
د ملګرو ملتونو پراختیايي پروګرام (UNDP) په یوه تازه راپور کې ویلي چې د افغانستان ۹۷ سلنه وګړي د انرژۍ له شدید فقر سره مخ دي، چې دې وضعیت د هېواد په ښوونیز او روغتیايي سیسټمونو کې جدي خنډونه رامنځته کړي دي.
د ملګرو ملتونو پراختیايي ادارې د دوشنبې په ورځ په یوه خپره کړې اعلامیه کې ویلي، چې په افغانستان کې د انرژۍ نشتوالی د خلکو پر ورځني ژوند او بنسټیزو خدمتونو باندې ژورې منفي اغېزې ښندلې دي. دغې ادارې په خپله ایکس (پخواني ټویټر) پاڼه لیکلي چې د برېښنا کمښت نه یوازې د خلکو ورځني کارونه ګډوډ کړي، بلکې د روغتیا په څېر حیاتي خدمتونه یې هم له ستونزو سره مخ کړي، چې تر ټولو ډېر زیان یې زیانمنونکو وګړو ته اوښتی دی.
لمریزه انرژي د هیلې یوه سرچینه
د دې ننګونو سره سره، دغه سازمان وايي چې د لمریزې انرژۍ کارونې په ځینو سیمو، په ځانګړې توګه په ښوونیزو او روغتیايي مرکزونو کې، د هیلې یوه باثباته سرچینه رامنځته کړې ده. د UNDP په وینا، یوازې سږ کال د افغانستان په مرکزي سیمو کې ۲۳ ښوونیز مرکزونه د لمریزې برېښنا په تختو سمبال شوي دي. د دې اقدام په پایله کې، له ۱۰ زره او ۳۰۰ څخه ډېر زدهکوونکي باثباته انرژۍ ته لاسرسی موندلی او د زدهکړو کیفیت یې لوړ شوی دی.
د دې تر څنګ، یو شمېر روغتیايي مرکزونه هم په لمریزو سیستمونو سمبال شوي ترڅو وکولای شي د برېښنا پر ناپایدارې شبکې له تکیې پرته خپلو خدماتو ته دوام ورکړي.
پر وارداتي برېښنا تکیه
افغانستان په لویه کچه له ګاونډیو هېوادونو څخه پر وارداتي برېښنا تکیه کوي. خو دا واردات د هېواد د کورنیو اړتیاوو د پوره کولو لپاره کافي نه دي او حتی لوی ښارونه هم د انرژۍ له جدي کمښت سره مخ دي.
ملګري ملتونه وايي چې د نوي کیدونکې انرژۍ، په ځانګړې توګه د لمریزې برېښنا، د کارونې پراختیا کولای شي له دې وضعیت سره د مقابلې او د میلیونونو افغانانو د ژوند شرایطو د ښه کولو لپاره یوه اغېزمنه حل لاره وي.
