ملګرو ملتونو ويلي چې داسې شواهد يې موندلي چې له مخې يې د روسيې او اوکراين ځواکونو د جګړې له ډګره دباندې بنديان اعدام کړي دي
د اوکراين په پلازمېنه کيف کې د بشري حقونو د څار لپاره د ملګرو ملتونو د دفتر رييسې، ماتيلدا بوګنر د جمعې په ورځ (د مارچ ۲۴مه) خپل يو راپور وړاندې کړ. د نوموړې په وينا، روسي او اوکرايني ځواکونو اسيران وژلي او شکنجه کړي دي.
په کيف کې د ملګرو ملتونو د نوموړي دفتر له خوا له هغه څخه لږ وخت وروسته دا تورونه رابرسېره شوي کله چې کيف پر روسيې د يو اوکرايني اسير د وژلو تور ولګاوه. کيف ويلي ول چې روسي ځواکونو يو نيول شوی اوکرايني چارواکی په ډزو وژلی او د هغه ويډيو يې جوړه کړې ده، په ويډيو کې راغلي چې اوکراينی اسير څنګه له وژل کیدو مخکې د «اوکراين زنده باد» شعار ورکوي.
د ۲۵ روسي اسيرانو ډله ییز اعدام
ماتيلدا بوګنر ويلي دي چې ادارې يې د دواړو اړخونو له خوا اعدامونه ثبت کړي دي. هغه د جمعې په ورځ په کيف کې يوه خبري کنفرانس ته د وينا پر مهال وويل:”موږ د وسلوالو اوکرايني ځواکونو لخوا د ۲۵ روسي جنګي اسيرانو د ډليز اعدام راپور په ژوره توګه اندېښمن کړي يو.” هغې زياته کړه: “داسي څه اکثراً د جګړې په ډګر کې د نيولو پر مهال سمدلاسه ترسره شوي.”
د ملګرو ملتونو د یاد دفتر رييسې وويل چې د اوکرايني چارواکو لخوا په پنځو مواردو کې د پلټونو له جريان څخه خبره ده چې د ۲۲ قربانیانو په هکله دي. هغې زياته کړه: “خو موږ د عاملينو د محاکمې په هکله مالومات نه لرو.”
نور ولولوئ: ملګري ملتونه وايي په افغانستان کې دې نجونو او هلکانو ته د ښه کيفيت زده کړو مساوي فرصت برابر شي
بوګنر د وسلوالو روسي ځواکونو لخوا د ۱۵ اوکرايني اسيرانو د نيول کېدو وروسته د هغوی د ادعا شوو اعدامونو په تړاو هم ژوره اندېښنه وښوده. هغې وويل چې د واګنر اجيره ډله چې ادعا کوي چې پر بخموت باندې د روسي تعرض مشري کوي، له يادو اعدامونو څخه د ۱۱ وژنو مسوول دی. د بخموت محاذ پر اوکراين د روسي د تعرض تر ټولو اوږد او خونړی محاذ بلل کيږي.
مسکو او کيف د جګړې له تېر يو کال له پېل راهيسي په دوامداره توګه یو پر بل د جنګي اسيرانو او زندانيانو سره د ناوړه چلن کولو تورونه لګوي.
د اوکراين د باندنيو چارو وزارت د ملګرو ملتونو د ياد راپور په غبرګون کې ويلي دي چې دا ورته د منلو نه دي چې د تېري قربانيان دي مسوول ونيول شي.
د اوکراين او روسيې د جګړې نږدې دوه کاله پوره کيږي او لا يې هم پايلې نامالومې دي.
