ناروې له طالبانو سره د نجونو پر زده کړو د بندیز له امله ددغه ډلې سره ډیپوماټیکې اړیکې راکموي

طالبانو د ناروې د شاهي دولت پر دغه پرېکړه خواشیني څرګنده کړې ده او ویلي یې دي چې د ناروې دغه اقدام به د دواړو هېوادونو پر ډیپلوماټیکو اړیکو ناوړه اغېز وکړي.

ناروې ویلي دي چې د طالبانو هېڅ ډول استازی به په دغه هېواد کې ونه مني.

د طالبانو بهرنيو چارو وزارت د ناروې دولت پر هغه پرېکړه خپګان ښودلی، چې له افغان مېرمنو سره د دغې ډلې د چلند له امله د دوی استازي نه مني او ډیپلوماټیک اړیکي ور سره کموي. طالبانو د ناروې له شاهي دولت غوښتي، چې دا ډول پرېکړې بايد «د هېوادونو په داخلي چارو پورې ونه تړل شي.»

پر افغانستان د طالبانو د واکمنۍ څه باندې درې کاله کېږي، خو نړیوالو تر اوسه په رسمیت نه دي پېژندلي.

د ښځو پر وړاندې د طالبانو ځپونکي تګلارې

ملګري ملتونه او د بشر حقونو سازمانونه وايي، د نجونو او ښځو پر وړاندې د طالبانو ځپونکي تګلارې باید د جینوسایډ په توګه په رسمیت وپېژندل شي.

له افغان مېرمنو او نجونو سره د طالبانو د کړونو په غبرګون کې ناروې د پنجشنبې په ورځ اعلان وکړ، چې د طالبانو له لوري هر ډول معرفي شوی استازی به ونه مني.

نور ولولئ: ایران: د طالبانو په رسمیت پېژندلو کې د افغان ولس اراده شرط ده

نور ولولئ: چین: د طالبانو رژیم د رسمیت پېژندلو لپاره له سیمو هېوادو سره مشورې کوو

د طالبانو بهرنيو چارو وزارت د جمعې په ورځ په يوه اعلاميه کې د ناروې دولت پر دې پرېکړې خواشني ښودلې او ویلي یې دي، چې د متقابل تفاهم او احترام پر بنسټ دیپلوماتیکه ښکيلتيا تاثير لري.

طالبان او قونسلي خدمتونه

طالبانو کونسلي خدمتونو ته لاس رسی د هر وګړي حق ګڼلی او زياتوي: «موږ ټول لوري جدي هڅوو، چې دې اصل ته د نړيوالو همکاريو په روحیه لومړيتوب ورکړي.»

خو طالبان په ډېرو هېوادونو کې د افغانستان په سفارتونو کې د پخواني حکومت استازي نه مني او پر کارونو یې محدوديتونه زيات کړي.

په ناروې کې د افغانستان د سفارت چارې د پخواني حکومت د چارواکو له لوري مخ ته وړل کېدلې، چې د سپتمبر په ۱۲ مه د طالب چارواکو په غوښتنه وتړل شو.

طالبان د ۱۴۰۰ کال په زمري مياشت کې پر افغانستان واکمن شول، چې د څه باندي درېيو کلنو په تېرېدو تر اوسه هيڅ یوه هېواد په رسميت نه دي پېژندلي.