ننګرهار کې د کانال شرکت وايي، ننګرهار کې د مالټو سږنی حاصل به تر نورو کلونو لوړ وي
ننګرهار کې د طالبانو تر واک لاندې د کانال شرکت مسوولین په دې ولایت کې د مالټو سږنیو حاصلاتو ته په کتو اټکل کوي، چې تر ۳۵۰۰ ټنو به ورسېږي.
د یاد شرکت ویاند سیدهمایون غریبمل وایي، تېر کال د همدې درېیم فارم حاصلات ۳۲۰۰ ټنه وو، چې سږکال دا حاصلات تر ۳۵۰۰ ټنه رسېږي.
د کورنیو تولیداتو د بهبود لپاره هڅې
غریبمل وایي د وطني مالټو د بڼوالو د ګټې او ښه بازار په خاطر یې له پاکستانه په را واردېدونکو مالټو تعرفه هم لوړه کړې، څو هېوادوال له خپلو کورنیو تولیداتو ګټه واخلي.
هرکاب د مالټو فصل په رارسېدو ننګرهار ته د هېواد له بیلابیلو سیمو د سیلانیانو ورتګ زیاتېږي.
نور ولولئ: څنګه له خوږو شیانو او سره کړو خوړو سره علاقه کمه کړو؟
نور ولولئ: په هېواد کې د غلو په حاصلاتو کې ډېر کموالي راغلي
نور ولولئ: کندهار کې د انځرو حاصلات د تېر کال په پرتله زیات شوي
سږکال هم د نورو کلونو په پرتله بې شمیره سیلانیان د ننګرهار د مالټو باغونو ته ور مات دي او له نېږدې ننداره کوي.
د مالټو پلورونکي بیا وایي؛ د مالټو د نندارې بازار ګرم دی، خو د اخیستلو بازار یې کمرنګه دی.
دوی وایي د بېوزلۍ له امله یې یواځې هغه خلک اخیستلی شي، چې په اوسني نظام کې دنده ولري او یا بل لوی کاروبار ولري.
د خلکو اقتصادي ستونزې
مالټو ته ورغلی شاه جهان یواځې د مالټو ننداره کوي او د اخیستو توان یې نه لري.
هغه وایي: ( ما فکر کوه چې ارزانه به وي، د خوراک سره به کورته هم یو څه یوسم خو دلته چې راغلم یو من ۴۰۰ تر ۴۵۰ افغانۍ ده چې ما غوندې سړی یې د اخیستو توان ځکه نه لري، چې دا مې د دوه ورځو د کور لګښت کېږي.)
دی له طالبانو غوښتنه کوي، چې پر کورنیو تولیداتو څار وکړي او بیې دې داخل کې یو څه راټیټې کړي.
پر افغانستان د طالبانو له بیا ځل واکمنېدو سره په دغه هېواد کې اقتصادي ستونزې په زیاتېدو شوې او ګڼ خلک بې روزګاره شوي دي.
نړیواله ټولنه وايي، که په افغانستان کې د جدي بې روزګارۍ مخه ونه نیول شي، نو خلک به له سختو ستونزو سره مخامخ شي.
طالبانو بیا ویلی چې ددوی تر واک لاندې افغانستان کې د روزګارۍ د له منځه وړلو لپاره هڅې روانې دي، خو کارپوهان بیا زیاتوي چې طالبان ددې جوګه نه دي تر څو په افغانستان کې بې روزګاره خلکو ته د کار زمینه برابره کړي.
