اړوند خبرونه:
ډاکټر عبدالله عبدالله: پر ایران د اسرائیلو بریدونه نامشروع دي
د ایران د پارلمان رئیس: پر اسراییل برید ‘غاښ ماتوونکی ځواب’ دی
امریکا د اسرائیل پر وړاندې د ایران ګواښونه جدي بللي
د ولسمشر ډونالډ ټرمپ مرستیال سلاکار او د ترهګرۍ ضد مبارزه کې عالي رییس، سبسټیان ګورکا په یوه ناسته کې ویلي، چې طالبان د ترهګرۍ ضد مبارزه کې امریکا سره په «منځنۍ کچه» همکار دي.
ګورکا دا خبرې د «ولسمشر ټرمپ د ترهګرۍ ضد نوې ستراتیژۍ تګلارې چوکاټ» په یوه پنل کې کړې دي.
نوموړي زیاته کړې چې ښایي دا خبره زما له خولې عجیبه ښکاري، خو طالبانو د ترهګرۍ ضد مبارزه کې زموږ همکاري کړې ده.
د امریکا او طالبانو ترمنځ چې د دوحې قرارداد کې پټې ضمیمې هم شته، باور ښودل کېږي افغانستان کې د امریکا ګټو ته ګواښ پېښوونکو «ترهګرو ډلو» پر ضد مبارزه د پټو ضمایمو برخه ده.
د پخواني جمهوري دولت د ولسمشر غني مرستیال، امرالله صالح هم په خپلو وروستیو څرګندونو کې ټينګار کړی، چې که د دوحې پټ ضمایم د افغانستان د ملي ګټو خلاف نه وي، ولې یې طالبان نه ښکاره کوي؟
دغه راز سبسټیان ګورکا زیاته کړې چې طالبانو سره د افراطي ډلو پر ضد جګړه کې بشپړه همغږي نشته، خو په دې اړه کار روان دی، ځکه له دې ډلو یې ځينې طالبانو ته هم ګواښ دي.
د داعش وسله والې ډلې خراسان څانګه چې اوس افغانستان کې باور ښودل کېږي، د څه باندې ۲۰ فعالو ترهګرو ډلو له منځه قوي ده، طالبان یې وخت ناوخت پر وړاندې د سختو عملیاتو خبر ورکوي.
سبسټیان ګورکا په خپلو خبرو کې دا هم زیاته کړې، چې د افغانستان په اړه ډېرې د باور وړ ژمنې شته، خو نور جزییات یې نه دي ورکړي. خو د ترهګرۍ ضد مبارزه کې امریکا سره د طالبانو د همکارۍ خبره نوې نه ده.
څو میاشتې وړاندې د متحده ایالاتو د بهرنیو چارو وزیر، مارکو روبیو هم وویل، چې کله یې د ترهګرۍ ضد مبارزه کې پر طالبانو غږ کړی، «ډېره ښه همکاري» یې کړې ده.
طالبانو تر اوسه رسماً څه نه دي ویلي چې امریکا سره په کومه کچه د ترهګرۍ ضد ګډه مبارزه کوي.
