د روسیې ولسمشر ویلي، په دې شرط اورند کوي چې اوکراین له څلورو سیمو خپل ځواکونه وباسي
مسکو دغه شرطونه ساده او اسان بللي، خو د نړیوال سیاست کارپوهان وايي، مسکو او متحدین به یې دغه ډول شرطونه ونه مني.
د کامبریج پوهنتون پروفیسور مارک بیلي وايي، روسیې داسې شرط وړاندې کړی چې کېدای له دغه شرطونو ناټو، اوکراین او غرب په شا شي.
د سولې لپاره د اوکراین له غوښتنو سره په ټکر کې د پوتین دا شرطونه د سویس د سولې کانفرانس په درشل کې دي چې مسکو ور بلل شوی نه دی.
روسیه له کومو سیمو د اوکرایني ځواکونو وتل غواړي؟
خو ولادیمیر پوتین نن په مسکو کې وویل، چې دا شرطونه ډېر ساده دي.
د رویټرز د راپور له مخې، هغه د خپلو شرطونو بیانولو سره وویل، چې کیف دې د اوکراین په ختیځ او سوېل کې خپل ټول ځواکونه، له دونڅک، لوهانسک، خرسون او زپروژیا نه وباسي.
هغه زیاته کړه: «که دوی په کیف کې په ډاګه کړي چې دې پرېکړې ته تیار دي، له دې سیمو د ځواکونو وتل پیل کړي او دا رسمي اعلان هم وکړي چې په ناټو کې نور غړیتوب نه غواړي، نو زموږ لوری به سملاسي ټیک په همغه شېبه کې د اوربند امر پلی او خبرې به پیل کړي.»
نور ولولئ: ناټو د “اوکراین پلان” لپاره د ۱۰۰میلیارد ډالرو پر ورکړې بحث کوي
نور ولولئ: امریکا به اوکراین ته د جرمني په څېر غښتلی هوايي دفاعي سېستم ورکړي
نوموړي بیا وویل. «زه تکراروم چې موږ به سملاسي همداسې وکړو، طبعا موږ به له دې سیمو د اوکرایني ځواکونو خوندي او بې خنډه وتل هم تضمین کړو.»
په جګړه کې د روسیې پرمختګ
روسیې پر اوکراین په برید سره په تېرو دریو کلونو کې د دغه هېواد پر پنځمه برخه خاوره ولکه کړې ده.
اوکراین وايي، په دې شرط سوله کوي چې روسي ځواکونه د دوی له سیمو ووځي او پر دې خاوره د کیف حاکمیت ومنل شي.
د ولادیمیر پوتین دا نوې خبرې د دې اونۍ وروستیو کې د سویس یا سوېزرلنډ د سولې کانفرنس په درشل کې دي، چې له ۹۰ د ډېرو هېوادونو او سازمانونو استازي پکې ګډون کوي.
د ایجنډا له مخې به په دې ناسته کې پر ځمکني ملکیت د خبرو پر ځای په اوکراین کې خوړو او اټومي خوندیتوب په هکله خبرې وشي.
دا په داسې حال کې ده چې روسیې د اوکراین په ځینو نیول شویو سیمو کې د روسیې د ټاکنو قانون اعلان کړ او ویې ویل چې دغه سیمې نور په روسیه پورې تړلي دي.
