ددې فلم ځینې برخې په سینماګانو کې د هنر او فلم مینهوالو ته وښودل شوې
ټایګر ۳؛ د هند او پاکستان استخباراتي کړنو په اړه د سلمان خان نوی فلم دی چې زیات ټیکټونه یې هم پلورل شوي دي.
د بالیووډ “سلطان” سلمان خان “ټایګر ۳” فلم د یکشنبې په ورځ د هندوانو تر ټولو مشهور جشن “دیوالي” په ورځ د هند په سینماګانو کې په پراخه کچه نندارې ته وړاندې شو.
نور ولولئ: عجیب او غریب: ایا ایشوریه رای له ونې سره واده کړی و؟
له مخکې د ټکټونو اخیستلو د شمېر له پلوه، دا تر اوسه د سلمان خان درېیمه ستره پرانیسته بلل کېږي.
د هندوستان ټایمز د راپور له مخې، دغه فلم په هند کې په لومړۍ ورځ ۴۰۰ میلیونه هندي روپۍ ګټه کړې، په داسې حال کې چې تر دې مخکې د سلمان خان فلم ‘بھارت’ ۴۲۰ میلیونه او پریم رتن دھان پایو څه باندې ۴۰۰ میلیونه کلدارې ګټلې وې.
د یاد فلم څومره ټیکټونه پلورل شوي دي؟
د فلمونو مشهور کره کتونکی او د فلم د سوداګرۍ کارپوه ترن ادرش پر خپله اېکس (پخواني ټوېټر) لیکلي، د دې فلم ۲۷۱۰۰۰ ټکټونه پلورل شوي، په داسې حال کې چې د دوشنبې په ورځ (نن) تر ۱۰۰۰۰۰ زیات ټکټونه مخکې له مخکې اخیستل شوي دي.
د هغه په وینا دا فلم په ځانګړې توګه د شپې ۱۲ بجې نندارې ته وړاندې شوی دی. تر دې وړاندې په ممبۍ کې هېڅکله د فلم لیدلو لپاره دومره لیوالتیا نه وه.
د یش راج فلمز تر چتر لاندې جوړ شوی دا فلم د ادیتیا چوپړا لخوا جوړ شوی او د دې فلم لارښود یا ډایرېکټر منیش شرما دی.
په دې فلم کې د سلمان خان تر څنګ کترینه کېف او عمران هاشمي هم لوبېدلي. او دا په ۲۰۱۷ کال کې د “ټایګر زنده هی” فلم دویم پړاو بلل کېږي.
د ټایګر۳ فلم په زړه پورې کیسه
دا فلم هم د لومړي فلم په څېر د پاکستان د استخباراتي ادارې (ای اېس ای) او د هند اتخباراتو (را) تر منځ د پټو پروژو پر کیسې ولاړ دی. په فلم کې سلمان خان د هندي جاسوس رول لوبولی او عمران هاشمي د پاکستاني ادارې د مشر رول لوبولی دی.
په دې فلم کې د هند بل فلمي ستوري شاه رخ خان چې د بالیووډ پاچا بلل کېږي، یو کوچنی رول لري.
دغه راز بل فلمي ستوری ریتک روشن هم د مېجر کبیر دهلیوال په رول کې د میلمه په توګه راڅرګندېږي. دا فلم چې په هندي، تامیل او تیلګو ژبو جوړ شوی د یکشنبې په ورځ د هند په سینماګانو کې نندارې ته وړاندې شو.
په ټولنیزو رسنیو کې له ډېرې مودې راهیسې د دغه فلم په اړه ګونګوسي روان وو او د سلمان خان مینه وال دې فلم ته په تمه وو.
د شاه رخ او سلمان خان مینه وال تل هڅه کوي چې له یو بل څخه مخکې شي، داسې لکه په فوټبال کې د میسي او رونالډو مینه وال او یا هم په کرېکټ کې د ویرات کوهلي او روهیت شرما مینه وال یو د بل په پېغورونو کولو لیدل کېږي.
نور ولولئ: په نیټفلیکس کې د ۲۰۲۳ کال ډېر کتل شوي هندي فلمونه
په ټولنیزو رسنیو کې د ټایګر ۳ فلم هشټګ د هغه له اعلانونو سره ډېر خپور شوی دی. او له تېرې ورځې راهیسې مینه وال د فلم د کیسې او لوبغاړو په اړه خبرې کوي.
د سني شاینس په نوم یوه کاروونکي د فلم په اړه د لوړ پوړي ژورنالیست ابهیسار شرما نظر شریک کړی او لیکلي یې دي “کله چې د اکشن فلمونو خبره راځي سلمان خان د بالیووډ رسمي پلار دی. هیڅوک نشي کولای له هغه سره سیالي وکړي.”
ابهیسر شرما وايي، له ډیرې مودې وروسته مې داسې یو فلم ولید چې د یوې شیبې لپاره مې هم له پردې سترګې پټې نه کړې. ایا دا فلم د پټان څخه ښه دی؟ یقینا له پټان څخه غوره دی. دا نه یوازې د پټان پرتله ښه دی، ان له ټولو هغو اکشن فلمونو خورا ښه دی چې سږکال تر دې دمه راوتلي دي.
