پاکستان کې افغان محصلین له یوه لنډمهاله قانوني خوندیتوب برخمن شوي دي. د سند عالي محکمې د پاکستان د طبي او غاښونو شورا هغه لارښوونه ځنډولې چې له مخې یې له افغان محصلینو غوښتل شوي وو، د خپلو زده کړو له بشپړولو مخکې افغانستان ته ستانه شي.
پاکستانۍ «ډان» او «عرب نیوز» راپور ورکړی چې محکمې په کراچۍ کې په بېلابېلو پوهنتونونو کې پر زده کړو بوخت ۳۴ افغان محصلینو ته لنډمهاله قانوني خوندیتوب ورکړی دی.
د ۳۴ افغان محصلینو په استازیتوب عریضې
د راپور له مخې، د پاکستان د طبي او غاښونو شورا د یادو لارښوونو پر وړاندې محکمې ته دوه جلا عریضې وړاندې شوې دي.
یوه عریضه د ډاو میډیکل کالج د طب د وروستي کال د درېیو افغان محصلینو له خوا ثبت شوې، په داسې حال کې چې دویمه عریضه د ډاو پوهنتون، جناح پوسټ ګرېجویټ میډیکل سنټر او نورو روغتیايي بنسټونو د ۳۱ افغان محصلینو په استازیتوب ثبت شوې ده. پاکستان کې افغان محصلین
محکمې تر سپټمبر ۲۹مې د اقدام مخه ونیوله
د سند عالي محکمې دوهکسیزې جرګې پاکستاني چارواکو ته امر کړی چې د سپټمبر تر ۲۹مې پورې د دغو افغان محصلینو پر وړاندې هېڅ ډول جبري اقدام ونه کړي.
محکمې ویلي چې د اعتراض وړ خبرتیاوې به تر دې نېټې پورې ځنډول شوې وي او پر عریضه کوونکو به د ایستلو یا بل ډول جبري اقدام نه کېږي. پاکستان کې افغان محصلین
په عریضه کې ادعا شوې چې د پاکستان د طبي او غاښونو شورا خبرتیا له قانوني صلاحیت پرته صادره شوې ده.
د قضیې په مقابل لوري کې د پاکستان دولت، د کورنیو چارو وزارت، د طبي او غاښونو شورا، د لوړو زده کړو کمېسیون، ډاو پوهنتون، د سند د پولیسو عمومي مشر او په کراچۍ کې د عیدګاه پولیسو حوزې اړوند چارواکي شامل دي.
پاکستان کې افغان محصلین اوس لږ تر لږه تر سپټمبر ۲۹مې پورې د محکمې له لنډمهاله خوندیتوب څخه برخمن دي، خو د قضیې وروستۍ پرېکړه لا نه ده شوې.
