پر بحرین د ایران برید؛ پر ملکي صنعتي تاسیساتو د برید له امله اورلګېدنه رامنځته شوې

د بحرین چارواکي وایي چې پر بحرین د ایران برید له امله په ملکي صنعتي تاسیساتو کې اورلګېدنه رامنځته شوې، خو چاته پکې ځاني زیان نه دی اوښتی.
د بحرین د کورنیو چارو وزارت اعلان کړی چې د ایران له لوري په دغه هېواد کې ځینې ملکي صنعتي تاسیسات په نښه شوي دي.
د یاد وزارت په وینا، د دغه برید له امله په یادو تاسیساتو کې اورلګېدنه رامنځته شوې، خو د اوروژنې ډلو په وخت رسېدو سره وضعیت کنټرول شوی دی.
بحریني چارواکو ډاډ ورکړی چې پر بحرین د ایران برید کې هېڅ ملکي وګړي یا کارکوونکي ته مرګژوبله نه ده اوښتې او یوازې مالي زیانونه اوښتي دي.
پر بحرین د ایران برید او د هوايي دفاع غبرګون
بلخوا، نړیوالو رسنیو د بحرین د پوځي سرچینو په حواله راپور ورکړی چې د دغه هېواد هوايي دفاعي سیستم په خپل وخت عمل کړی دی.
د راپورونو پر بنسټ، د بحرین دفاعي ځواکونو د ایران له لوري توغول شوي څو نور هوايي اهداف په هوا کې شنډ کړي او هدف ته له رسېدو مخکې یې له منځه وړي دي.
سیمهییز امنیتي شنونکي باور لري چې پر بحرین د ایران برید د سیمې پر روان امنیتي وضعیت مستقیم اغېز کوي او د کړکېچ د لا پراخېدو اندېښنې یې زیاتې کړې دي.
د ایران سپاه پاسدارانو دریځ
په ورته وخت کې، د ایران د اسلامي انقلاب ساتونکي ځواک (سپاه پاسداران) د یوې اعلامیې په خپرولو سره د دغو عملیاتو مسوولیت منلی دی.
یاد ځواک ادعا کړې چې د بحرین په الرفاع او العوالي سیمو کې یې هغه پوځي اډې او تاسیسات په نښه کړي چې د امریکايي ځواکونو اړوند دي.
خو د بحرین حکومت دا ادعا رد کړې او ټینګار کوي چې پر بحرین د ایران برید په مستقیم ډول ملکي او صنعتي برخې زیانمنې کړې دي.
اوسمهال په سیمه کې امنیتي تدابیر تر بل هر وخت ډېر سخت شوي او نړیواله ټولنه له دواړو لورو د زغم غوښتنه کوي.



