د افغانستان د کانونو سکټور ته د سیمې د هېوادونو لېوالتیا په زیاتېدو ده، او تازه چینايي او ازبکستاني پانګوالو هم د افغانستان پر فلزي او غیر فلزي کانونو د پانګونې لپاره چمتووالی ښودلی دی.
د کانونو او پټرولیم وزارت د معلوماتو له مخې، د چین او ازبکستان یو شمېر سوداګرو او پانګوالو کابل ته د سفر پر مهال د دغه وزارت له مالي او اداري مرستیال مولوي حسامالدین صابري سره کتلي دي.
د افغانستان پر فلزي او غیر فلزي کانونو د پانګونې خبرې
د لیدنې پر مهال دواړو لورو د افغانستان پر فلزي او غیر فلزي کانونو د پانګونې فرصتونو، د استخراج بهیر او د همکاریو د پراختیا په اړه خبرې کړې دي.
چارواکي وایي، بهرنیو پانګوالو د افغانستان د کانونو په سکټور کې پانګونې ته لېوالتیا ښودلې او هڅه کوي چې په دې برخه کې عملي ګامونه واخلي.
افغانستان د مسو، اوسپنې، سرو زرو، لیتیوم، مرمرو او ګڼو نورو قیمتي او صنعتي کانونو پراخې زېرمې لري، چې په وروستیو کلونو کې یې د سیمې او نړۍ د پانګوالو پام ځان ته اړولی دی.
چین او ازبکستان ولې د افغانستان کانونو ته لېواله دي؟
اقتصادي شنونکي باور لري چې د افغانستان جغرافیایي موقعیت او د طبیعي زېرمو پراخ ظرفیت د دې لامل شوی چې د سیمې هېوادونه د کانونو په سکټور کې پانګونې ته لېوالتیا وښيي.
چین تر دې وړاندې هم د افغانستان په ځینو لویو کانیزو پروژو کې حضور درلود، او ازبکستان بیا هڅه کوي له افغانستان سره اقتصادي او سوداګریزې اړیکې پراخې کړي.
د کانونو وزارت ویلي، حکومت هڅه کوي چې د پانګوالو لپاره لازمې اسانتیاوې برابرې کړي او د قانوني چوکاټ له لارې د کانونو په برخه کې د کورنیو او بهرنیو پانګونو زمینه نوره هم پراخه کړي.
