اړوند خبرونه:
ډاکټر عبدالله عبدالله: پر ایران د اسرائیلو بریدونه نامشروع دي
د ایران د پارلمان رئیس: پر اسراییل برید ‘غاښ ماتوونکی ځواب’ دی
امریکا د اسرائیل پر وړاندې د ایران ګواښونه جدي بللي
د عرب او اسلامي هېوادونو مشرانو او د بهرنیو چارو وزیرانو، د قطر په پلازمېنه دوحه کې بېړنۍ غونډه کړې ده.
دا بېړنۍ غونډه په قطر باندې د اسراییلو د هوايي برید په غبرګون کې ترسره کیږي، چې د حماس مشران یې په نښه کړل او لږترلږه پنځه د حماس غړي او یو قطري امنیتي افسر یې ووژل.
د قطر په خاوره کې دې ناڅاپي برید نه یوازې په غزه کې د جګړې د پای ته رسولو لپاره خبرې اترې ګډوډې کړې بلکې عربي نړۍ یې هم حیرانه کړه. قطر دا برید بزدلانه وباله او مشرانو یې له نړیوالې ټولنې وغوښتل چې اسراییلو ته د ټولو نړیوالو نورمونو د سرغړونې په خاطر سزا ورکړي.
د یادونې وړ ده چې د عربي او اسلامي هیوادونو د مشرانو د غونډې څخه مخکې، پرون (یکشنبه، د سپتمبر ۱۴مه) په دوحه کې د دغو هیوادونو د بهرنیو چارو وزیرانو په ګډون یوه مقدماتي غونډه وشوه.
د چمتووالي غونډه د قطر د لومړي وزیر او بهرنیو چارو وزیر شیخ محمد بن عبدالرحمن ال ثاني په مشرۍ وشوه. ال ثاني پر قطر د اسراییلو برید “وحشیانه” او “ترهګریز” وباله او له نړیوالې ټولنې یې وغوښتل چې دوه ګونی معیارونه پریږدي او اسراییل د خپلو جرمونو مسؤل وګڼي.
هغه همدارنګه ټینګار وکړ: “اسرائیل باید پوه شي چې د فلسطیني خلکو په وړاندې د دوی روانه نسل وژنې جګړه، چې موخه یې د دوی د جبري لیږد په هدف ده، هیڅکله به بریالۍ نشي، پرته له دې چې د دې جرم لپاره کوم غلط توجیه وړاندې کړي.”
د غونډې د پریکړه لیک مسوده د اسراییلو دښمنانه کړنې غندي، په شمول د قطر برید، او اسراییل د نسل وژنې، قومي تصفیې، بندیز او پراختیا غوښتونکو پالیسیو تورنوي.
