د روسیې ولسمشر شمالي کوریا ته له ۲۴ کلونو وروسته سفر وکړ او هلته یې له کیم جونګ اون سره دفاعي تړون لاسلیک کړ
د روسیې ولسمشر ولادیمیر پوتین نن شمالي کوریا ته په تلو د کوربه هېواد له مشر سره په دفاعي برخه کې تړونونه لاسلیک کړل، چې د مسکو او پیونګ یانګ ترمنځ پوځي او هر اړخیزې همکارۍ نور هم زیاتوي.
کیم جونګ اون دا تړون ټولیز ستراتیژیک مشارکت وباله او پر اوکراین یې د روسیې د برید ملاتړ هم وکړ.
دغه تړون سولهپال بلل شوی
د رویټرز د راپور له مخې، کیم جونګ اون خبرغونډه کې وویل «دا تړون بلکل سوله پال او دفاعي دی» او زیاته یې کړه، چې له سره به د مسکو او پیونګ یانګ ترمنځ په سیاسي، اقتصادي او دفاعي برخه کې همکاری زیاته شي.
د هغه په خبره، زموږ دوو هېوادونو اړیکي له اتحاد هم پورته شوي دي.
نوموړي له پوتین سره د خبرو په لومړیو کې د اوکراین جګړه کې د مسکو ملاتړ وکړ.
نور ولولئ: ولادیمیر پوتین منځني ختیځ ته په تاریخي سفر لاړ
نور ولولئ: پوتین: “که اوکراین ته لویدیځوال ځواکونه واستوي، د اټومي جګړې امکان ډېرېږي”
د روسیې دولتی رسنۍ ریا وايي، ښاغلي پوتین د کیم جونګ اون مننه وکړه چې د اوکراین په ګډون د روسیې له سیاست پرلپسې او نه کمېدونکی ملاتړ کوي.
ښاغلي پوتین په دې غونډه کې ویلي چې مسکو د امریکا او د هغې د ملګرو له امپریالیستي او هژمونیک سیاست سره مقابله کوي.
روسیه د غرب له مقابل کې د شمالي کوریا ملاتړ کوي
نوموړي شمالي کوریا ته تر روانېدو مخکې ویلي و، چې مسکو د واشنګټن په مقابل کې د پیونګ یانګ ملاتړ کوي.
شمالي کوریا ته د روسیې د ولسمشر د سفر په درشل کې ناټو ویلي و چې دا سازمان وېرېږي مسکو به د پیونګ یانګ د توغندیز او اټومي پلان ملاتو وکړي.
شمالي کوریا ته په سفر کې له ولادیمیر پوتین سره د بهرنیو چارو، دفاع، روغتیا او ټرانسپورټ وزیران او نور لوړپوړي چارواکي هم دي.
دا له نږدې څلرویشتو کلونو راهیسې لومړی ځل دی چې د روسیې ولسمشر شمالي کوریا ته ځي.
ولادیمیر پوتین تېر سپټمبر د سوچي غونډې ته د شمالي کوریا مشر بللی و او هغه وخت کیم جونګ اون ښاغلی پوتین پیونګ یانګ ته ور وباله. په اوسنۍ لیدنه کې ښاغلي پوتین بیا کیم جونګ اون ته د مسکو د سفر بلنه ور کړه.
د یادونې وړ ده چې شمالي کوریا ته د ولسمشر پوتین سفر امریکا، ناټو او د هغه متحدین اندېښمن کړي دي.
