د کوټې د اورګاډي په تمځای کې درنې چاودنې ۲۵ کسان وژلي او ۵۳ یې ټپیان کړي دي
په پاکستان کې ناامنۍ زور اخیستی او د سیمې اوسېدونکی وايي چې په کنټرول کې یې د پاکستان امنیتي استګاه پاتې راغلي ده.
د بلوچستان په مرکز کوټه کې نن شنبه (د نومبر ۹مه) سهار وختي د اورګاډو یوه تمځای کې ځانمرګی برید شوی دی.
ځايي امنیتي چارواکو بيبيسي ته ویلي، په دې پېښه کې د بریدګر په ګډون لږترلږه ۲۵ کسان وژل شوي او ۵۳ نور ټپیان دي.
ددغه برید مسئولیت
د برید مسوولیت د بلوڅ بېلتونپالو ازادي غوښتونکي پوځ (بياېلاې) منلی.
د دې ډلې ویاند ‘جنید بلوڅ’ رسنیو ته په یوه لنډ استولي بیان کې ویلي، “نن سهار یې د کوټې اورګاډو تمځای کې د پاکستاني ځواکونو پر یوې ډلې ځانمرګی برید کړی”.
هغه زیاته کړې، چې دا برید د دوی د “فدايي بریدونو څانګې مجید لوا” کړی او دا چې جزییات به یې وروسته خپاره شي.
نور ولولئ: د پاکستان پوج: کراچۍ کې مو د ټي ټي پي خطرناکه اوولس کسیز ګروپ نیولی
نور ولولئ: اسلام اباد له طالبانو د ټي ټي پي د له منځه وړلو غوښتنه وکړه
نور ولولئ: په پاکستان کې د ناامنۍ اوج؛ د باجوړ چاودنه کې پخوانی پاکستانی سناتور ووژل شو
د پاکستان پوځ تر اوسه د دې پېښې په اړه څه نه دي ویلي.
خو د بلوچستان د پولیسو یوه چارواکي محمد بلوڅ رسنیو ویلي، پر عامو خلکو سربېره پوځيان هم دغه تمځای کاروي او دا چې د دې پېښې په قربانیانو کې هم ملکیان او پوځیان دواړه شامل دي.
د وژل شویو د شمېر د زیاتېدو ویره
هغه د اورګاډو دغه تمځای کې له رسنیو سره خبرو کې اندېښنه ښودلې، چې د وژل شویو شمېر ښايي لوړ شي.
ښاغلي بلوڅ وویل، دا برید داسې مهال وشو چې د “جعفر اېکسپرېس” لسګونه مساپر اورګاډي ته منتظر وو.
د امنیتي کمرو په وسیله اخیستل شویو تصویرونو کې هم ښکاري چې د پېښې پر مهال لسګونه کسان تمځای کې موجود دي.
په دغه برید کې ټپي شوي کسان د کوټې ښار ملکي روغتون ته لېږدول شوي دی.
د بلوچستان مشر وزیر سرفراز بګټي د کوټې د اورګاډو پر تمځي برید غندلی او په دې تړاو یې د څېړونو امر کړی دی.
هغه ویلي، د بې ګناه خلکو هدف ګرځوونکي “ترهګر” د زړهسوي وړ نه دي.
د بلوچستان اعلی وزیر زیاته کړې، چې په دغه ایالت کې د ترهګرۍ ضد عملیات دوام لري، “ګڼو پېښو کې ښکېل ترهګر نیول شوي” او دا چې په دې پېښه کې ښکېل کسان به هم خپله سزا وګوري.
د یادونې ده چې بلوڅ بېلتونپالو مخکې هم پاکستان کې د بېلابېلو خونړیو ځانمرګو بریدونو مسوولیت منلی دی.
