یونېسف پر اېکس پاڼه لیکلي چې زیاتره افغان مېرمنې له کلینیک او ډاکټرې پرته زیږون کوي
په افغانستان کې د طالبانو په راتګ د روغتیا په برخه کې ګڼې ستونزې رامنځته شوي، ځکه د طبي سکتور د برخې متخصصین، تمویلوونکي او نور مرسته کوونکي بنسټونه له دغه هېواده ووتل، خو تر ټولو ډېر زیان یې بیا مور او ماشوم ته اوښتی دی.
په افغانستان کې د مور او ماشوم د مړینې کچه چې په د طالبانو له واکمنۍ وړاندې یو څه راټیټه شوې وه، بېرته بیا په لوړېدو ده.
په دې اړه د یونېسف اندېښنه
د ملګرو ملتونو د ماشومانو وجهي صندوق «یونېسف» وايي، چې په افغانستان کې یو پر درېیمه امېندواره مېرمنې له روغتیايي مرکزونو بهر زېږون کوي.
دغه سازمان ویلي، چې په افغانستان کې له ۶۷ سلنې څخه زیات زېږونونه د یوه مسلکي روغتیايي متخصص له خوا ترسره کیږي.
نور ولولئ: د روغتیا لپاره د شیدو څښلو ګټې
نور ولولئ: د انسان روغتیا ته د فضايي سفر خطرونه
یونیسیف د دوشنبې په ورځ وویل چې هغه امیندواره میرمنې چې د روغتیا پاملرنې متخصص پرته له روغتیایی مرکزونو بهر زیږون کوي د دوی ژوند له جدي خطر سره مخ کوي.
دغې ادارې په مزارشریف کې د نسایي ولادي فهیمې د ژوند کیسه کې لیکلي، “امیندواره میرمنې باید لږ تر لږه څلور ځله د زیږون دمخه یو وړ ډاکټر ته مراجعه وکړي، خو په افغانستان کې یوازې یو پر دریمه برخه میرمنې دا کار کوي.”
د امیندوارو ښځو ستونزې
دغه کارپوه یونیسیف ته وویل چې ډیری امیندواره میرمنې نه پوهیږي چې څنګه د امیندوارۍ پرمهال ځان ته صحي خواړه چمتو کړي.
د روغتیا نړیوال سازمان وايي، په ټول افغانستان کې هره ورځ ۲۴ میندې او ۱۶۷ ماشومان د حمل او ولادت د مخنیوي وړ ناروغیو له امله مري.
ملګرو ملتونو هم افغانستان د میندو د مړینې له پلوه یو له بدو هېوادونو څخه بللی دی.
د روغتیا د نړیوال سازمان د معلوماتو له مخې له ۲۰۱۷ کال راهیسې په افغانستان کې د هرو ۱۰۰ زیږونونو پر سر ۶۳۸ ښځې مړه شوي دي.
پر دې سربېره، چې په افغانستان کې طبي برخه کې د ښځینه ډاکټرانو له کمښت سره مخامخ ده، طالبانو د نجونو پر مخ د پوهنتونونو او ښوونځیو دروازې تړلي دي.
بېلابېلو بنسټونو د اندېښنې په ښکاره کولو سره ویلي، که چېرته طالبان د زده کړو مرکزونه خلاص نه کړي، نو په نږدې راتلونکې کې به د ښځینه نرسانو، ډاکټرانو او قابلو بې برخې افغانستان ولرو.
