اوکرایني چارواکي وايي چې د هېواد په ختیځ ښار باخموت کې یې ځینې سیمې بېرته له روسي ځواکونو نیولې دي. د اوکرایني ځواکونو دغه پرمختګ په تېرو څو میاشتو کې کمساری بلل کېږي
اوکرایني چارواکي وايي چې د دوی ځواکونو په یوه اوونۍ کې دوه کیلومتره پرمختګ کړی، او روسیې ویلي چې ځواکونه یې په یوه سیمه کې بېرته یو ځای شوي.
نور ولولئ: چین کولای شي د اوکراین د جګړې په پای ته رسولو کي کومک وکړي
که څه هم په باخموت کې دا د وضعیت بدلون یوه اشاره ده، خو په ټول کې د باخموت لپاره د اوکراین ځوابي بریدونو څرګند شواهد نه دي لیدل شوي.
پر خواله رسنۍ ټیلیګرام یوه پیغام کې د دفاع وزارت مرستیاله هنا مالیار وايي، په داسې حال کې چې اوکرایني ځواکونو د هيڅ یوه ځای له لاسه ورکولو پرته له روسي ځواکونو دوه کیلومتره سیمه ونیوله چې روسي ځواکونو ته درانه زیانونه هم اوښتي دي.
بل لور د روسیې تر کنټرول لاندې لوهانڅک کې د جمعې پر ورځ د دوو چاودنو غږونه اورېدل شوي دي
په ختېځ اوکراین کې د جګړې لومړۍ کرښې ته له نژدې ۹۰ کیلومتره لېرې پرتې سیمې نه د لوګي پورته کېدو تصویرونه خپاره شوي دي.
د دې چاودنو لامل څرګند شوی نه دی، خو له هغه يوازې دوې ورځې وروسته کېږي چې بریتانیا وویل: اوکراین ته یې د توپان سیوری نومي داسې کروز توغندي ورکړي چې په اوږده واټن کې ګوزار کوي.
نور ولولئ: روسیه: د اوکراین باخموت ښار مو نیولی؛ اوکراین وايي جګړه لا روانه ده
د یادونې ده چې لوهانڅک سیمه کې روسي هدفونه د هیمارس نومي توغندیو د ګوزار له حده لېرې پرته سیمه ده چې مخکې پرې اوکرایني ځواکونو تکیه کوله.
له دې مخکې د روسیې دفاع وزارت وویل: د باخموت په یوه سیمه کې یې د ستراتيژیکو لاملونو له کبله خپل ځای بدل کړی دی.
د روسيې دفاع وزارت چارواکي وايي، د دوی ځواکونو له دفاعي پلوه یوه غوره ځای کې یو ځای شوي دي
خو د روسیې ملېشو واګنر مشر یوګیني پرېګوژین بیا وايي، هغه څه چې د روسیې دفاع وزارت یې وايي، د بیا یو ځای کېدو پر ځای تېښته ده.
نور ولولئ: اوکراین او روسیې سلګونه بندیان تبادله کړي دي
که څه هم د باخموت تکنيکل اهمیت په هکله ماهرین یوه خوله نه دي، خو د ډېرو په اند د خونړۍ جګړې په دې پړاو کې یې سمبولیک اهمیت ډېر دی.
