په میدان وردګو ولایت کې د تېرې ورځې سیلابونو ۲۶ تنه مړه، ۴۴ کسان ټپیان او لسګونه لا ورک دي
پېښو ته د رسېدو په چارو کې د طالبانو حکومت د دولت وزارت وايي وروستیو سېلابونو تر ټولو درنه مرګ ژوبله او زیان د میدان وردګو په ولایت کې رسولی دی.
د یاد وزارت ویاند شفیع الله رحیمي د ‘یکشنبې’ په ورځ بي بي سي پښتو ته وویل د تېرې شپې د سېلابونو له کبله په میدان وردګو ولایت کې ” ۲۶ تنه مړه، ۴۴ ټپیان او ۳۶ نور کسان نادرکه دي.”
د ده په وینا دا وروستۍ شمېرې نه دي او په ډېر احتمال چې د زیانمنو شمېر زیات وي.
نور ولولئ: اوچا وايي افغانستان کې ۲۱.۲ میلیونه خلک د څښلو اوبو ته لاس رسی نه لري
هغه پغمان ولسوالۍ کې هم د ورښتونو له کبله د زیان اوښتو خبره کړې ده.
کابل کې چارواکو ویلي د پغمان ولسوالي په ارغندي سیمه کې د سېلابونو له امله ۸ کسانو خپل ژوند بایللی، ۲۰ تنه ټپيان شوي.
دغو سیلابونو کورونه او کرنیزې ځمکې ویجاړې کړي
د رپوټونو له مخې دغو سېلابونو د هستوګنې ګڼ شمېر کورنه هم ویجاړ کړي او ډيری کرنیزې ځمکې یې هم له منځه وړي دي.
په ورته مهال، ځايي چارواکو د طالبانو تر واک لاندې د افغانستان ملي تلویزیون ته ویلي چې سېلابونه تېره شپه د وردګو ولایت مرکز میدان ښار، جلرېز، نرخ، سید اباد، جغتو او چک ولسوالیو کې راوتلي.
نور ولولئ: د هېواد په بېلا بېلو ولایتونو کې سیلابونه
ملي تلویزیون د خلکو په حواله لیکلي ” د تېرې شپې سېلابونو له امله ۲۲ کسانو خپل ژوند بایللی، لسګونه کسان نادرکه او د استوګنې سلګونه کورونه ویجاړ شوي دي.”
هغه سیمې چې زیاتې زیانمنې شوي
په ورته وخت کې، د وردګو ولایت طبیعي پېښو ته د رسېدو ادارې ویلي، د تېرې شپې د سېلابونو له کبله میدان ښار، جلرېز، چک، نرخ، سید اباد او جغتو ولسوالیو کې تر اوسه “۲۲ تنه مړه شوي او لسګونه نور ورک” دي.
خو د مړو شویو د شمېر په تړاو د نوموړي څرګندونې تر اوسه کومې بلې سرچینې نه دي تایید کړې.
وردګ ولایت کې د طالبانو حکومتي مسولین وايي، جغتو ولسوالۍ کې سلګونه جريبه کرنیزه ځمکه سېلابونو لاندې کړې او شاوخوا ۱۰۰۰ جرېبه کروندې او باغونه یې خراب کړي وو.
د وردګو ور ها خوا په کونړ او پکتیا ولایتونو کې هم د سېلابونو راوتلو ویل شوي دي.
د افغانستان د هوا پېژندنې ادارې وار له مخه په ځينو ولایتونو کې د سختو ورښتونو اټکل کړی وو او خلکو ته یې د چمتووالي سپارښتنه کړې وه.
