د برېښنا پورونه ورکړل شول، خو لا هم پرچاوي ډېره ده
![electricity۲](https://afghannow.net/wp-content/uploads/2024/02/Electricity۲-780x470.jpg)
د طالبانو تر کنټرول لاندې د برېښنا شرکت وايي چې د برېښنا ټول پورونه یې ورکړي، خو لا هم پرچاوي ډېره ده
طالبانو وایي، چې د پرځول شوي جمهوریت پاتې پورونه یې ازبکستان، تاجکستان، ترکمنستان او ایران ورکړي دي.
د طالبانو د برېښنا شرکت ویاند حکمت الله میوندي د سې شنبې په ورځ (د سلواغې ۱۷مه) نېټه پر خپله اېکس پاڼه لیکلي، د دغو هېوادونو پورونه چې شاوخوا ۶۲۷ میلیونه امریکايي ډالرو ته رسېدل په بشپړه توګه ورکړل شول.
![gfoeb4rwcaau1n](https://afghannow.net/wp-content/uploads/2024/02/GFoEB4rWcAAu1N_-300x225.jpeg)
د نوموړي په خبره، یاده اندازه پورونه له تېر حکومت څخه پاتې و چې پر بانکونو د بندیزونو له لیرې کېدو وروسته دغه ریاست وکولی شول خپل ټول پورونه پرې کړي.
د برېښنا پر کورنیو سرچینو کار روان دی
ښاغلی میوندي زیاتوي، د افغانستان اتیا سلنه برېښنا چې وارداتي ده، اوسمهال د برېښنا د کمښت ستونزې د حل په موخه پر کورنیو سرچینو کار روان دی.
هغه وایي، «د یوه پنځه کلن ستراتیژیک پلان له مخې به د کورنیو منابعو پرمټ ۷۱۰ میګاواټه برېښنا ولرو.»
نور ولولئ: افغانستان د ۲۲۲۰۰۰ میګاواټه برښنا د تولید ظرفیت لري
نور ولولئ: ملا برادر: ایران دې د برښنا تولید برخه کې همکاري وکړي
نور ولولئ: کابل کې د برښنا دوامداره پرچاوي؛ طالبانو له تاجکستان سره د لېږد تړون تمدید کړ
اخوا د افغانستان ځینو رسنیو د امریکا په کلمبا پوهنتون کې د «یورو اسیا نېټ» خپلواکې رسنۍ بیا د طالبانو د ادارې له لوري یوازې د تاجکستان د برېښنا د پورونو د ورکړې خبر ورکړی.
![electricity1](https://afghannow.net/wp-content/uploads/2024/02/Electricity1-300x170.jpg)
د برېښنا شرکت مسوولانو د روان کال د غبرګولي په میاشت کې ویلي و، چې یاد ریاست په میاشت کې د ۱۵ میلیونه ډالرو په ارزښت له ګاونډیو هیوادونو برېښنا واردوي
په افغانستان کې د برېښنا پرچاوي
د افغانستان د برېښنا ریاست ادعا کوي چې ټول پورونه یې ادا کړي او ددې تر څنګ یې د برېښنا په برخه کې نورو سرچینې هم تر کار لاندې دي، خو پر دې ټولو سربېره بیا هم په کابل او ولایتونو کې د برېښنا پرچاوي ډېره ده او خلک له دغه پرچاوي څخه سر ټکوي.
خلک رسنیو ته وايي چې په ۲۴ ساعتونو کې ۱۰ ساعته برېښنا وي، خو د برېښنا بېل هماغسې د پخوا په څېر ډېر پسې راځي او ورباندې تحویلېږي.
داسې راپورونه هم خپاره شوي چې طالبان ځینو صنعتي فابریکو ته د بډو په بدل کې برېښنا ورکوي او همدا لامل دی چې د برېښنا پرچاوي ډېره شوي ده.
د یادونې وړ ده چې افغانستان اوسمهال د برېښنا ډېری اړتیاوې د سیمې له هیوادونو په ځانګړې توګه له ازبکستان او تاجکستان څخه په وارداتي برېښنا پوره کوي.