انتوني بلېکن د اوکراین ولسمشر ته د پوځي مرستو ور رسېدلو په اړه ډاډ ورکړی دی
د امریکا بهرنیو چارو وزیر نن اوکراین ته داسې مهال سفر وکړ چې د امریکا کانګرس د اوکراین لپاره ۶۱ میلیارده ډالره بودجه تصویب کړه.
دا له اوکراین سره تر بل وخت ډېره پوځي مرسته ده چې امریکا یې ورسره کوي.
د امریکا د بهرنیو چارو وزیر انتوني بلینکن د اوکراین ولسمشر ولادیمیر زیلینسکي ته ویلي چې له دغه هېواد سره د امریکا پوځي مرستې «په لاره » کې دي.
د اوکراین پوځ تجهیزول
د رویټرز خبري اژانس د راپور پر بنسټ، بلینکن دا څرګندونې سېشنبه مې پر ۱۴مه په کییف کې له زیلینسکي سره د لیدنې پرمهال کړې دي.
بلینکن زیاته کړې چې د اوکراین پوځ لپاره د امریکا مرستې د نوې کڅوړې رارسېدل به «د جګړې په ډګر کې یو واقعي بدلون رامنځته کړي.»
ورته مهال، زیلینسکي اوکراین ته د امریکا د مرستو کڅوړه «خورا اړینه» بللې ده.
نور ولولئ: ناټو چین ته خبرداری ورکړی چې د اوکراین خلاف روسیې ته وسلې ورنه کړي
نور ولولئ: د ناټو ځینې غړي هېوادونه: “اوکراین ته ځواکونه، نه استوو”
زیلینسکي ټینګار کړی چې د هېواد پوځ یې د خارکیف ښار د دفاع لپاره دوو پټریوټ هوايي دفاعي سیسټمونو ته اړتیا لري.
د امریکا د بهرنیو چارو وزیر انتوني بلینکن نن په یوه نااعلان شوي سفر کییف ته ورسېد.
کیف ته د بلېکن سفر
دا اوکراین ته د امریکا کانګرېس له خوا دغه هېواد سره د ۶۱ میلیارډه ډالرو کڅوړې تر تصویب وروسته کییف ته د یو چګپوړي امریکايي چارواکي لومړنی سفر دی.
یو امریکایي چارواکي رویټرز ته وویل: «بلینکن د اورګاډي له لارې کییف ته رسیدلی او هیلهمند دی څو د اوکراینیانو ته چې له سختو شرایطو سره مخ دي د امریکا د قوي ملاتړ پیغام ورسوي.»
د بلینکن دا سفر په داسې حال کې ترسره کېږي چې د اوکراین پر سرحدي سیمو د روسیې د پوځي فشارونه زیات شوي دي.
روسیې له تېرې جمعې راهیسې د خارکیف پر سرحدي ښارګوټو درانه بریدونه پیل کړي او لږترلږه پنځه ښارګوټي یې ولکې لاندې راوستي.
په ورته وخت پرون د روسیې ولسمشر ولادیمیر پوټین خپل دفاع وزیر له دندې ګوښه کړ. د هغه ګوښه کول داسې پیغام ورکوي چې اوکراین سره به د مسکو جګړه نور هم سخته شي.
مسکو څو ځله غرب ته خبرداری ورکړی چې د اوکراین له ملاتړه لاس واخلي، خو د اوکراین تر شا امریکا او غربي هېوادونه ولاړ دي او د روسیې پرضد یې حمایه کوي.
