د طالبانو د امر په معروف وزیر: هغوی ډارن دي چې د نړیوالې ټولنې له غوښتنو سره سم عمل غواړي
د طالبانو د امر په معروف او نهې له منکر وزیر په هرات کې يوې غونډ ته ويلي، ځینې خلک فکر کوي، چې که طالبان د نړیوالې ټولنې «فرمایشونه» ونه مني نو کمزوري، یوازې او انزوا کې به پاته شي. محمد خالد حنفي ويلي، هغه کسان، چې دا ډول فکرونه لري « غلط او ډارن» دي.
د طالبانو د امربالمعروف وزارت ویاند سیف الاسلام خيبر د جمعې په ورځ (د ليندۍ ۲ مه) پر خپله اېکس پاڼه د خالد حنفي د وينا یوه ږغيزه برخه نشر کړې او ورسره یې لیکلي، چې د دوی وزير په هرات کې یوې خبرې غونډې ته په وینا کې وویل، چې دا ډول فکر غلط دی.
په نړیوالو ټولنه کې د طالبانو منزوي کېدل
سیف الاسلام خيبر لیکلي،د امربالمعروف وزیر ویلي، چې ځینې خلک فکر کوي که طالبان د دین ټول احکام پلي کړي او له نړیوالې ټولنې سره لکه څنګه، چې دوی یې غواړي تعامل ونه لري، دوی به ضعيف، یوازې او منزوي پاتې شي.
د خالد حنفي ویاند د هغه له قوله ليکلي، چې دا ډول خلک «ډارن»، له «مجازي ډار» اغیزمن او د «حقیقي ځواک» يې له پامه غورځیدلی دی.
خالد حنفي ټینګار کړی، چې طالبان به تر هغو بریالي نه شي، چې «د خدای د رضا لپاره د مخلوقاتو (خلکو) خوښي له پامه ونه غورځوي.»
نور ولولئ: د کاناډا لومړی وزیر: پر افغان ښځو د طالبانو بندیزونه له وحشته ډک دي
نور ولولئ: پر ښځو د طالبانو کاربندیز؛ ملګرو ملتونو په افغانستان کې د خپلو عملیاتي چارو ارزونه پيل کړې
د امربالمعروف وزیر ویلي چې طالبان به «د خدای له رضا پرته ځواکمن، متمدن او مطرح نه شي.»
د طالبانو د رژیم په اړ ه
د دغه طالب وزير په خبره، په دې برخه کې د هیچا د تهمتونو، بد ویلو او ملامتيو پروا نه لري.
خالد حنفي دا هم ويلي، که «الله ج، د دوی شهیدانو او ملت» ته وفاداره پاته شي نو «نظام به دایم او قایم» وي.
نوموړي زياته کړې: «که دوی د اغيارو په وجه په اسلامي نظامي کې سستي راوستل الله مو بیا دغو خلکو ته پرېږدي او نظام به له منځه ځي.»
د امربالمعروف وزارت د ویاند په خپاره شوي متن کې د کوم مشخص کس یادونه نه ده شوې؛ خو راپورونه ښیي، چې طالب مشران له نړیوالې ټولنې سره د تعامل د څرنګوالی او د دې ډلې د «اسلامي شریعت» د پلي کولو په برخو کې اختلاف لري.
تر دې وړاندې داسې راپورونه خپاره شوي وو، چې په کابل کې یو شمېر طالب چارواکي په کندهار کې د طالبانو له مشرتابه سره اختلاف لري.
