په بنګله دېش کې په ټرمپ مشهور سنډا د لوی اختر له رارسېدو مخکې د ټولنیزو رسنیو د کاروونکو او د سیمې د خلکو پراخه پاملرنه ځانته اړولې ده. دغه سنډا د خپل ځانګړي رنګ، غټو ښکرونو او د سر د طلايي ویښتانو له امله مشهوره شوې ده.
راپورونه وایي، دا سنډا شاوخوا ۷۰۰ کیلوګرامه وزن لري او ډهاکې ته نږدې په یوه فارم کې ساتل کېږي. د سنډا بڼه ډېرو خلکو ته د امریکا د ولسمشر ډونالډ ټرمپ ویښتان ورپه یاد کړي، له همدې امله خلکو پرې “په ټرمپ مشهور سنډا” نوم ایښی دی.
د سنډا ویډیوګانو خلکو ته پام ور واړاوه
د دې سنډا شهرت هغه وخت زیات شو، کله چې د فارم کارکوونکو یې د ویښتانو مینځلو او پاکولو ویډیوګانې په ټولنیزو رسنیو کې خپرې کړې. له هغې وروسته ګڼ خلک فارم ته د سنډا لیدو لپاره ورځي او ورسره عکسونه او ویډیوګانې اخلي.
ځايي خلک وایي، د سنډا ځانګړې بڼه او ارام طبیعت د دې لامل شوی چې په لنډ وخت کې مشهور شي. ځینې کسان یوازې د همدې څاروي د لیدو لپاره فارم ته ورځي.
د فارم مالک څه وایي؟
د فارم مالک وايي، په ټرمپ مشهور سنډا په ځانګړې پاملرنې ساتل کېږي او هره ورځ یې پالنه کېږي. د هغه په وینا، کارکوونکي د سنډا ویښتان پاکوي او منظم یې سمبالوي، څو روغ او پاک پاتې شي.
هغه زیاتوي، د خلکو د ډېرې ګڼې ګوڼې له امله سنډا لږ وزن هم له لاسه ورکړی، ځکه هره ورځ لسګونه کسان د لیدو لپاره فارم ته ورځي.
د لوی اختر لپاره پلورل شوې
راپورونه ښيي چې په ټرمپ مشهور سنډا د لوی اختر د قربانۍ لپاره پلورل شوې او ټاکل شوې د اختر په ورځو کې حلاله شي. د سنډا مشهورېدو نه یوازې د فارم نوم مشهور کړی، بلکې په ټولنیزو رسنیو کې یې هم پراخ بحثونه راپارولي دي.
