د اروپایي ټولنې مرسته؛ اروپايي ټولنه وايي، په تېرو پنځو کلونو کې یې له افغانستان سره د څه باندې ۲ میلیارد یورو مرسته کړې ده چې د بشري اړتیاوو، اساسي خدمتونو او د خلکو د معیشت د ملاتړ په برخو کې لګول شوې ده.
اروپايي ټولنې د پنجشنبې په ورځ په یوه خبرپاڼه کې ویلي، د دې مرستو یوه مهمه برخه د روغتیا، پوهنې، بشري مرستو او نورو اړینو خدمتونو لپاره ځانګړې شوې ده.
د اروپايي ټولنې په وینا، دغه مرستې د ملګرو ملتونو د ادارو، د سره صلیب نړیوالې کمېټې، د افغاني سرې میاشتې ټولنې، نړیوال بانک او یو شمېر نادولتي مؤسسو له لارې افغانانو ته رسول شوې دي.
د اروپایي ټولنې مرسته په کومو برخو کې لګول شوې؟
د اروپايي ټولنې د معلوماتو له مخې، د مرستو یوه برخه د ښځو د اقتصادي پیاوړتیا، کوچنیو پورونو، کوچنیو کاروبارونو او د اقلیمي بدلون اړوند نوښتونو لپاره هم ځانګړې شوې ده.
د دې ترڅنګ، د اروپایي ټولنې مرسته د مدني ټولنې او رسنیو د ملاتړ او د افغانستان د خلکو د ځینو اساسي اړتیاوو د پوره کولو لپاره هم کارول شوې ده.
اروپايي ټولنه وايي، د بېځایه کېدو او کډوالۍ له ننګونو سره د مقابلې په برخه کې یې د افغانستان له راستنېدونکو او هغو کورنیو سره هم مرسته کړې چې د راستنېدونکو کوربهتوب کوي.
اروپايي ټولنه: د افغانستان د خلکو ملاتړ ته دوام ورکوو
د اروپايي ټولنې د بهرني سیاست مشرې کایا کالاس ویلي، دغه ټولنه به د افغانستان د خلکو ملاتړ ته دوام ورکړي.
د هغې په وینا، د اروپايي ټولنې مرستې د دې لپاره دي چې د افغانستان له خلکو سره د ستونزمن بشري او اقتصادي وضعیت پر مهال مرسته وشي.
د اروپايي ټولنې د معلوماتو له مخې، د دغو مرستو د پلي کېدو لپاره له نړیوالو او کورنیو بنسټونو سره همکاري شوې، څو اړینې مرستې او خدمات تر اړمنو خلکو ورسېږي.
په دې توګه، د اروپایي ټولنې مرسته یوازې په بیړنیو بشري مرستو پورې محدوده نه ده، بلکې د روغتیا، پوهنې، معیشت، کوچنیو کاروبارونو او ځینو ټولنیزو او اقتصادي پروګرامونو ملاتړ هم پکې شامل دی.
