څېړنې ښیي که منظم او پر وخت خوب ونه لرئ نو روغتیايي ستونزې درته پیدا کېږي

یوه نوې څېړنه سپارښتنه کوي چې د کاري او استراحت ورځو ترمنځ د خوب کولو عادتونو کې کوچني توپيرونه د انسان په کولمو کې غیر صحي باکتریایي بدلونونه رامنځته کوي.

بریتانوي څېړونکو دا څېړنه په هغو خلکو ترسره کړې چې د دا ډول ټولنیز عادت ترڅنګ یې خوراک او ځښاک هم کمزوری وي.

نور ولولئ: ښه خوب مو پر روغتیا مثبت اغېز کوي

دې عادت ته د “سوشل جېټلګ” کلیمه کارول شوې، یعنې هغه خلک چې د اونۍ د پای رخصتیو کې په ټاکلي وخت نه وېده کېږي، پر سبا یې له خوبه ناوخت پاڅېږي او بله شپه بیا د اصلي کاري ورځو په شان د شپې خوب نه ورځي.

څېړنه په ډاګه کوي چې د خوب دا ډول ګډوډول، په روغتیا منفي اغیز لري.

له خوبه پر منظم پاڅېدو ټینګار

څېړنه سپارښتنه کوي چې د خوب او له خوبه د پاڅېدو وختونه باید منظم وساتل شي، ترڅنګ یې د خوړو رژیم هم متوازن وي، نو دا عادت د ډېرو ناروغیو خطر را کمولی شي.

د لندن د کینګز کالج ساینس پوهانو دا څېړنه په نژدې زرو ځوانانو ترسره کړې او موندلې یې ده چې ان د یوې عادي اونۍ په لړ کې د شپې خوب د ۹۰ دقیقو توپیر، کولای شي د انسان په کولمو کې ګټورې باکتریاوې اغېزمنې کړي.

روغتیا پالان وایي د انسان په هاضمې سیسټم کې د ډول ډول باکتریاوو د پراخې لړۍ شتون ډېر مهم دی.

ځینې یې د نورو پرتله غوره دي، خو د سم مخلوط ترلاسه کول د یو شمېر ناروغیو مخنیوي لپاره ډېرې مهمې او بنسټيز رول لري.

دغه نوې څېړنه په ډاګه کوي، د بریتانیا نژدې ۴۰ سلنه وګړي له دې برخې اغېزمن دي، چې ډېره برخه یې هم تنکي هلکان او ځوانان دي.

د پخوانیو څېړنو موندنې

مخکینیو څېړنو بیا موندلې هغه خلک چې دا ډول عادت لري د هغو پرتله چې د خوب وخت یې ډېر منظم وي لږ فایبر لرونکي خواړه خوري.

مخکېنیو څېړنو بیا موندلې، غیرمنظم خوب ددې لامل کېږي چې د انسان وزن زیات، ناروغه او ذهني ستړیا سره مخ شي.

ددې څېړنې مشره ډاکټره کېټ برمنګم وایي:” نامنظم او لږ خوب د انسان پر ټاکنو اغېز کوي، او دا ډول خلک ډېره لېواله وي چې لوړ کاربوهایډریټ یا ډېر خواږه خواړه وخوري.”

نور ولولئ: د خه خوب لرلو لپاره څو اړین او اغېزناک ټکي

څېړونکو دا رنګه موندلې چې ددې ډول خلکو په کولمو کې له شپږو درې ډوله باکتریاوې ډېرې وې، ورسره د خوړو یې رژیم کمزوري، چاغوالی او پړسوب یې زیات او د زړه سکتې ګواښ یې هم لوړ وي.

د کینګز کالج څېړونکې ډاکټره سارا بېري وایي: ” د خوب منظم ساتل، یعنې کله چې د خوب ځای ته ځو او بیا چې سهار را پاڅېږو دا ټول د ژوند په کړنلاره پورې اړه لري او باید ورسره سمون ولري دا کار به ستاسو د روغتیا سره ډېره مرسته وکړي.”