پاکستاني سوداګر وايي، د افغانستان او پاکستان تر منځ په سوداګرۍ کې باید خنډونه لرې او پراختیا پیدا کړي
په فغانستان کې د هر دولت په راتګ اسلام اباد په سوداګرۍ کې افغان سوداګرو ته ستونزې جوړې کړي او په دې برخه کې د دواړو خواوو د سوداګرو شکایتونه هم ډېر وي.
په لاهور کې د افغان او پاکستاني سوداګرو په ګډه ناسته کې د لاهور د سوداګرۍ او صنایعو خونې مشر کاشف انور له افغانستان سره د سوداګریزو اړیکو پر پراختیا ټنیګار کړی او له افغان سوداګرو یې د سوداګرۍ د ودې لپاره د ګډو ګامونو پورته کولو غوښتنه کړې ده.
د سوادګرو لخوا پر ګډې سوداګرۍ ټینګار
پاکستاني رسنیو خبر ورکړی، چې د لاهور د سوداګرۍ او صنایعو خونې مشر کاشف انور د خان جان الکوزي په مشرۍ د افغانستان د سوداګرۍ خونې له غړو او سوداګرو سره د لاهور په سوداګرۍ خونه کې ګډه ناسته ترسره کړې ده.
د راپورونو له مخې، د لاهور د سوداګرۍ خونې مشر کاشف انور له افغان سوداګریز پلاوي سره په دغه ګډه ناسته کې له ګاونډیو هېوادونو سره د ښو سوداګریزو اړیکو پر پراختیا ټینګار کړی دی.
نور ولولئ: له پاکستان سره د اړیکو خرابوالی؛ د ډبرو سکرو په صادراتو کې ۶۵ سلنه کمښت راغلی
نور ولولئ: د افغانستان کانونه؛ قراردادونه یې شفاف او استخراج یې مسلکي نه دی
ښاغلي کاشف انور ویلي:« د پاکستان او افغانستان تر منځ سوداګري ۵۲۲ مېلیون ډالره ده، چې د ښه کېدو لپاره یې ځای شته؛ که بانکي چېنلونه جوړ شي، د سوداګرۍ حجم څو چنده زیاتېدلی شي. د درملو، غالیو، وريجو، د موټرو پرزو او نورو برخو کې د سوداګریزو اړیکو د پراخولو احتمال شتون لري. د سوداګرۍ وزارت په دې وروستیو کې د بارټر سیسټم لپاره یو حکم صادر کړی، چې له مخې به یې دوه اړخیزه سوداګري وده وکړي.»
له پاکستان سره د سوداګرۍ زیاتېدو لېوالتیا
په دغې لیدنه کې د افغان سوداګرو پلاوي مشر خان جان الکوزي ویلي چې، له پاکستان سره د سوداګرۍ زیاتولو ته لېوال دي؛ ځکه دواړه هېوادونه اوس یو بل ته تر بل هر وخت زیاته اړتیا لري:« د دواړو هېوادونو تر منځ ۷۰ سلنه سوداګري د لاهور له لارې کېږي، چې له دې لارې افغانستان ته درمل، وريجې، د موټرو پرزې او نور توکي صادرېږي.»
پاکستاني سوداګرو ویلي، د پاکستان او افغانستان تر منځ د تاریخي ټولنیزو او اقتصادي اړیکو سربېره، د دوه اړخیزو سوداګریزو حجم رېښتیني امکانات نه منعکسوي؛ نو د سوداګرۍ د ودې لپاره باید ګډ او کوټلي ګامونه پورته شي.
د یادونې وړ ده چې اسلام اباد په کراچۍ او ګوادر بندر کې افغان سوداګرو ته ستونزې جوړوي.
