امریکايي سفیره وايي چې د نړۍ هېوادونه باید د طالبانو پر وړاندې خپل یووالی وساتي، ځکه طالبان د ښځو پر وړاندې ظلم کوي
د ملګرو ملتونو د بشري حقونو په شورا کې د امریکا سفیرې ویلي، چې په افغانستان کې د ښځو وضعیت ورځ تر بلې خرابېږي.
نوموړې ټینګار کړی، چې امریکا او د نړۍ هېوادونه به تر هغو طالبان په رسمیت ونه پېژني، چې خپلې افراطي تګلارې بدلې نه کړي.
نور ولولئ: د بشري حقونو د څار سازمان: طالبان د ښځو او نجونو په مجازات سره د بشريت ضد جرم کوي
هغې د نړۍ له هېوادونو وغوښتل، چې د طالبانو د سیاستونو په اړه د خپلې اوسنۍ هوکړې په دوام او د اړیکو عادي کول باید د ډلې د چلند په بدلون پورې اړه ولري.
نړیوال د طالبانو تګلارې تغیرول غواړي
نړیوال په دې تمه دي چې طالبان به د ښځو او نورو افغانانو پر وړاندې خپلې تګلارې تغیر او بشر حقونو ته به پام وکړي، خو د دوو کلونو په تېرېدو دوی دې پایلې ته رسېږي چې طالبان کوم تغیر نه کوي.
د ګڼو نورو هېوادونو د استازیو په څېر، مېشل ټېلور د بشري حقونو د شورا په غونډه کې د خپلې وینا پر مهال، د افغانستان لپاره د دغې شورا د ځانګړي راپور ورکوونکي د څرګندونو ملاتړ وکړ.
ریچارډ بېنټ په ژنو کې د دوشنبې په ورځ د ملګرو ملتونو د بشري حقونو د شورا په ۵۴مه غونډه کې وویل، چې د ښځو پر وړاندې د طالبانو تګلارې ظالمانه دي.
طالبان په خپلو تګلارو کې بشري حقوق نقضوي
ریچارډ بېنټ زیاته کړه، چې طالبان د ښځو او نجونو حقونه محدودوي او تر ډېره یې تر پښو لاندې کوي. د امریکا سفیرې په خپله وینا کې وویل، طالبان هڅه کوي چې ښځې په بشپړه توګه له عامه ډګره لرې کړي.
نوموړې د نورو حکومتونو له استازو هم وغوښتل، چې د طالبانو پر وړاندې خپل یووالی وساتي او له دې ډلې وغواړي چې د ښځو او د افغان ټولنې د نورو برخو پر وړاندې خپله تګلاره بدله کړي.
نور ولولئ: د بشري حقوقو د څار سازمان بند امیر ته د ښځو پر تګ بندیز غندلی
اغلې ټېلور د طالبانو د نوم له اخیستو پرته وویل، چې د پخواني افغان حکومت د غړیو د وژلو او ربړولو په اړه شته راپورونه سم دي او په دې هکله یې اندېښنه څرګنده کړه؛ خو طالبانو په ځلونو د پخوانيو عسکرو د وژلو او ربړولو په اړه د بشري حقونو د سازمان راپورونه رد کړي دي.
پر دې سربېره طالبان هڅه کوي چې پر ښځو لا نور محدودیتونه وضع او له لومړنیو اساسي حقوقو یې بې برخې کړي.
