ایراني رسنیو د خرمشهر۴ یا خیبر په نوم د یوه لرې واټن ویشتونکي بالستیک توغندوي د مخکتنې خبرونه خپاره کړي دي
ایراني چارواکي خپل دغه نوي توغندي ته لوړ کاریدونکی او پوخ نښه ویشتونکي اصطلاح کاروي.
د ایران د دفاع وزیر محمد رضا آشتياني نن پنجشنبه د مې مياشتې په ۲۵ مه نېټه د توغندي په اړه جوړه شوې غونډه کې وویل چې خیبر کولی شي تر دوه زره کیلومتره لرې واټن په نښه کړي او برید پرې وکړي.
د ایران ایرنا خبري آژانس د دغه توغندي د وړتیا په هکله لیکلي:
“خیبر توغندی چې د خرمشهر۴ توغندیو د کورنۍ تر ټولو نوی نسل دی چې تر ۲۰۰۰ کیلومتره واټن ویشتلی شي. د نورو ځانګړتیاوو سربیره، تاکتیکي ځانګړتیاوې هم لري.”
نور ولولئ: شمالي کوریا دوه بالستیک توغندي آزمویلي
ویل شوي چې د دې توغندي او د نورو پخوانیو نسلونو ترمنځ یې توپیر دا دی چې خیبر کولی شي له ځمکې لوړ په فضا کې د خپل سفر په نیمايي کې د برید ځای لا ښه په نښه کړي او لا زیات دقیق شي.
ښاغلي آشتياني د یاد توغندي په پرانیست غونډه کې وویل چې لرې واټن ویشتونکی خیبر په سیمه کې د سولې او ثبات مرسته کوونکی دی.
نوموړي په همدې غونډه کې له خپل ملګرو د ملاتړ هیله هم وکړه.
تر دې مخکې د امریکا د دفاع وزارت استخباراتي څانګې(DIA) په یوه راپور کې ویلي و چې د امریکا لخوا له څو لسیزو بندیزونو سربېره ایران په دې توانیدلی چې ستر توغندي جوړي کړي.
نور ولولئ: شمالي کوریا وايي خپل تر ټولو زورور توغندی یې ازمویلی
یادې څانګې ویلي چې ایران د منځني ختیځ د سیمې د هېوادونو تر منځ د توغندیو تر ټولو ستر پروګرام لري.
د امریکا په باور د ایران د توغندیو جوړولو سیستم د اسراییلو د توغندیو جوړولو له سیستم څخه لوی دی
څه موده مخکې ايراني چارواکو د اوکراين جګړې په دوام کې په روسيه هېواد ځينې الوتکې پيرودلې وې. نوموړې الوتکې بېپيلوټه وې او له لرې يې نښان ويشتلی شو.