د تاجکستان حکومت د ملي کلتور په نوم د ږیرې او حجاب پر وړاندې محدودیتونه سخت کړي
په داسې حال کې چې په افغانستان کې د ښځو د مخ پټولو او د نارینهوو د ږیرو په اړه ځانګړي مقررات نافذ دي، په ګاونډي تاجکستان کې حکومت د ملي کلتور د ساتنې تر شعار لاندې د اسلامي حجاب او اوږدو ږیرو پر وړاندې خپل محدودیتونه لا پراخ کړي دي.
د رسنیو د راپورونو له مخې، د تاجکستان چارواکو په وروستیو کلونو کې د خلکو د لباس او ظاهري بڼې په اړه سختې تګلارې عملي کړې دي. حکومت وایي، دا اقدامات د ملي کلتور د پیاوړتیا او د افراطیت د مخنیوي لپاره دي، خو منتقدان باور لري چې دغه تګلارې د خلکو مذهبي ازادي محدودوي.
د ږیرې له امله نیول او د پولیسو څار
یو ۳۸ کلن سوداګر رسنیو ته ویلي چې پولیسو د اوږدې ږیرې له امله درې ورځې بندي کړی و. د هغه په وینا، تر خوشې کېدو وروسته هم اړ دی چې هره اوونۍ د واټساپ له لارې خپل نوی عکس پولیسو ته واستوي، څو ثابته کړي چې ږیره یې لنډه ساتلې ده.
راپورونه ښيي، که څه هم په تاجکستان کې د ږیرې د منع کولو لپاره کوم څرګند قانون نشته، خو ګڼ شمېر کسان د ږیرې له امله نیول شوي، ځینې یې په زور خرییل شوي او ځینې نور بیا جریمه شوي دي.
د ملي کلتور په نوم د حجاب محدودول
د تاجکستان حکومت په ۲۰۲۴ کال کې د «بهرني لباس» د منع قانون نافذ کړ. که څه هم په قانون کې د اسلامي حجاب نوم نه دی اخیستل شوی، خو په عملي ډول دغه محدودیت تر ډېره د اسلامي حجاب او دودیزو اسلامي جامو پر کارولو اغېز کوي.
چارواکي ټینګار کوي چې دا اقدامات د ملي کلتور د ساتنې او د افراطي افکارو د مخنیوي لپاره دي، خو یو شمېر تاجک مسلمانان وایي چې له دې وروسته اړ شوي په عامه ځایونو کې د خپل لباس او ظاهري بڼې په اړه له ډېر احتیاط څخه کار واخلي.
د قانون او عملي چلند ترمنځ توپیر
سره له دې چې د ښځو د لباس په اړه محدودیتونه په قانون کې ځای لري، خو د نارینهوو د ږیرې په اړه کوم واضح قانون نه شته. سره له دې، د ازادې اروپا/ازادي راډیو د راپور له مخې، ځینې نارینه یوازې د دې لپاره نیول کېږي چې چارواکي یې ږیره د مذهبي افراطیت نښه ګڼي.
دوو کسانو، چې د ږیرې له امله د پولیسو له لوري درول شوي وو، ویلي چې پولیسو یې ږیرې په زور خرییلې او وروسته یې پرته له کوم رسمي تور څخه خوشې کړل. دوی ادعا کوي چې ورته پېښې له نورو کسانو سره هم شوې دي.
د خلکو شکایتونه
د ځینو تاجک وګړو په وینا، پولیس په ځینو مواردو کې پر ږیرورو کسانو نور اداري تورونه هم لګوي، لکه د عامه نظم ګډوډول یا په هغو ځایونو کې د سګرېټ څکولو تور چې منع اعلان شوي وي.
شنونکي وایي، د ملي کلتور تر نوم لاندې د دغو محدودیتونو دوام په تاجکستان کې د مذهبي ازادیو او فردي حقونو په اړه بحثونه نور هم تاوده کړي دي.
