د طالبانو تر واک لاندې پوهنې وزارت د سختې ګرمۍ له امله د ښوونځیو رخصتي ۱۰ ورځې نوره هم وغځوله
د هوا پېژندنې ادارې لخوا د نیمروز، فراه، کندهار، هلمند، ننګرهار او یو شمېر نورو ولایتونو کې د سختې ګرمۍ را روانې څپې اټکل کړی دی، خو له نیمروز ولایت سرچینې وايي، په دې ولایت کې د سانټي ګریډ په حساب د ګرمۍ کچه ۴۸ او ۴۹ درجو ته رسېدلي ده.
له همدې امله د طالبانو د پوهنې وزارت د یوې اعلامیې په خپرولو سره ویلي، چې د سړو سیمو ولایتونو کې د تودوخې درجې د زیاتوالي له امله لس ورځې نور دې هم زدهکوونکي ښوونځیو ته نه ورځي.
دا رخصتۍ د سړو سیمو لپاره دي
د طالبانو د پوهنې وزارت د چهار شنبې په ورځ د (زمري ۱۰مه) د یوې اعلامیې په خپرولو سره ویلي، چې د هېواد د سړو سیمو په ولایتونو کې د تودوخې درجې د زیاتوالي له امله دې زدهکوونکي ښوونځیو ته نه ورځي.
دغه وزارت ویلي، چې د رسمي او خصوصي ښوونځیو دوبنۍ رخصتي د زمري میاشتې تر ۲۰مې نېټې پورې غځېدلې ده.
نور ولولئ: د طالبانو پر استخباراتو د بښنې نړیوال سازمان غږ؛ احمد فهیم عظیمي او صدیق الله افغان خوشي کړئ
نور ولولئ: طالبانو سیاسي شنونکی او د پوهنتون استاد نجیب الله جامع نیولی
د دغه ډلې د پوهنې وزارت ویلي، چې د ښوونځیو درسونه به د زمري میاشتې په ۲۰مه نېټه بېرته پیل شي.
خلکو ته د روغتیا نړیوال سازمان خبرداری
بل خوا د روغتیا نړۍوال سازمان تېره ورځ پر خپله اېکس پاڼه له خلکو غوښتي و، چې په سړو ځایونو کې دې پاتې شي.
دغه سازمان ویلي، چې د تودوخې درجې د لوړېدو له امله دې د لمر ضد عینکي وکاروي په منظمه توګه دې اوبه وڅښي او درانه کارونه دې نه کوي.
یاد سازمان په داسې مهال دغه لارښوونې کوي، چې په دې ورستیو کې د افغانستان په ډېرو ولایتونو کې د تودوخې درجه تر ۴۵ درجو هم اوښتې ده.
بل لور ته ساینسپوهان په نړۍ کې د ګرمۍ کچې لوړېدل اقلیمي بدلون بولي. دوی وايي، فضا ته د غازاتو خوشي کول او په نړۍ کې د زیاتو فابریکو او درنو ماشنیونو موجودیت د ګرمۍ د کچې لوړېدو اصلي لامل دی.
نړیوال کارپوهان او د اقلیم برخې څېړونکي په نړۍ کې د اقلیم ناڅاپي تغیر وارخطا کړي دي او ددوی هڅه داده چې د اقلیم ساتنې په برخه ټول هېوادونه ونډه واخلي او هوا ته د غازاتو د خوشي کېدو کچه راکمه کړي، خو له دې سره، سره بیا هم لا نه دي توانېدلي چې دغه ستونزه راکابو کړي.
