رشمیکا مندانا: ژبه مې هېڅکله د فلمي مسلک خنډ نه ده شوې
رشمیکا مندانا وايي، په بېلابېلو ژبو فلمونو کې د کار کولو لپاره یې له مخکې کوم ځانګړی پلان نه درلود، خو د فلمي سفر په پراخېدو سره یې په تدریج په تېلوګو، هندي، کناډا او تامل ژبو فلمونو کې هم کار پیل کړ.
رشمیکا د هند د کرناټکا ایالت د کوداګو ولسوالۍ اوسېدونکې ده. نوموړې وايي، د ژبې توپیر یې هېڅکله د فلمي مسلک پر وړاندې خنډ نه دی ګرځېدلی.
هغې ویلي: «زه کوډاوا یم او د کوډاوا ژبه وایم. زموږ په مورنۍ ژبه د فلمونو کوم صنعت نشته، نو ځکه ژبه هېڅکله زما د مسلک خنډ شوې نه ده. زه ټولې ژبې خپلې ژبې ګڼم.» رشمیکا مندانا
د مینهوالو غوښتنو د فلمي سفر لوری بدل کړ
رشمیکا وايي، د هغې مینهوالو، چې نوموړې یې خپله کورنۍ بولي، په پیل کې ترې پوښتل چې ولې په تېلوګو فلمونو کې کار نه کوي.
وروسته ورته د هندي فلمونو په اړه هم وړاندیزونه وشول او په دې توګه یې فلمي سفر له یوې ژبې څخه نورو ژبو ته وغځېد.
رشمیکا مندانا وايي، د بېلابېلو ژبو په فلمونو کې د کار کولو بهیر له مخکې پلان شوی نه و، بلکې د وخت په تېرېدو په خپله پراخ شو.
د لهجې په اړه د خلکو غبرګون
کله چې له رشمیکا څخه د هغې د لهجې په اړه د خلکو د غبرګون پوښتنه وشوه، هغې وویل، تر هغه چې وکولای شي په یوه ځانګړې ژبه کې شوې پوښتنې ته په هماغه ژبه ځواب ورکړي، دا ورته بسنه کوي. رشمیکا مندانا
د نوموړې په وینا، دا د نړۍ له بېلابېلو برخو څخه د خپلو نندارچیانو د درناوي یوه مناسبه لار ده.
رشمیکا وايي، په فلمونو کې د هغې د لهجې په اړه غیرضروري بحثونو ته ډېره پاملرنه نه کوي او هڅه کوي خپل تمرکز پر رول او اداکارۍ وساتي.
هغې ویلي: «د یوې اداکارې په توګه زما دنده دا ده چې په فلمي سیټ کې ښې کیسې وړاندې کړم او بیا خپل کور ته ستنه شم.»
پر خپل کار تمرکز کوي
رشمیکا باور لري چې د هر فلم ټول عوامل هڅه کوي خپلې وړتیاوې وکاروي او یو ښه اثر رامنځته کړي.
د هغې په وینا، د یوه فلم وروستۍ پایله د ټولو کسانو د ګډ کار محصول وي؛ له همدې امله هغه هڅه کوي د نورو په کارونو کې له لاسوهنې پرته خپله دنده په ښه توګه ترسره کړي.
په دې توګه، رشمیکا مندانا وايي چې د ژبې توپیرونه یې د فلمي مسلک پر وړاندې خنډ نه دي، بلکې د هغې فلمي سفر یې لا پراخ کړی دی.
