خلیلزاد د خیبر لویه جرګه د پښتنو د حقونو لپاره د پام وړ ګام وباله
ها خوا بیا ټي ټي پي خپلو وسله والو ته امر کړی چې د پاکستاني پوځ پر کمپونو او کتارونو خپلو بریدونو ته زور ورکړي.
د افغانستان لپاره د امریکا پخواني استازي، زلمي خلیلزاد، د پښتون ژغورنې غورځنګ له لوري د خپلو حقونو د ترلاسه کولو په خاطر د لویې جرګې جوړېدا یو هیله بخښونکی ګام وباله.
زلمي خلیلزاد په “ایکس” کې ولیکل چې له څو کلونو وروسته، د پښتون ژغورنې غورځنګ ښه ورځې ولیدې او د خپلو حقونو د ترلاسه کولو لپاره د پاکستان د حکومت په مخالفت کې د جرګې جوړول د پام وړ ګام و.
پښتنو قامي لویه جرګه او پي ټي اېم
هغه زیاته کړه، که څه هم د ارزونې لپاره لا وختي دی، خو هغو بریاوو ته په کتو چې دوی ترلاسه کړي، د پي ټي ایم مشرتابه هڅې د هیلو وړ دي.
خلیلزاد خبرداری ورکړ چې د پاکستان د حکومت، په ځانګړې توګه د پوځ د لوی درستیز جنرال عاصم غبرګون به د جرګې په اړه منفي وي.
نور ولولئ: د پښتو له قامي جرګې د خلکو د پام اړولو لپاره د پاکستاني پوځ هلې ځلې
نور ولولئ: د پښتنو قامي عدالت جرګه: په ۲ میاشتو باید د پښتون له خاورې د پاکستان پوځ او وسله والې ډلې ووځي
خلیلزاد وویل، د پاکستاني چارواکو له احتمالي غلیمانه اقداماتو سره سره خپلو اهدافو ته په رسیدو کې د جرګې د تنظیموونکو وړتیاوې د اهمیت وړ دي.
په پاکستان کې بې ثباتي
خلیلزاد وړاندې ویلي: سره له دې چې د بې ثباتۍ او حتی نښتې احتمال نه شي ردولی. ده زیاته کړې، که څه هم پي ټي ایم د سولهییزو لارو چارو هرکلی کوي، خو دوی د نورو انتخابونو لپاره هم تیاری نیسي.
د پښتنو د قومي عدالن درې ورځنۍ لویه جرګه د یکشنبې په ورځ په یوې اعلامیې پای ته ورسېده.
د پښتون ژغورنې غورځنګ مشر، منظور پښتین، د جرګې په پای کې په خپله وینا کې پر افغان طالبانو غږ وکړ چې د نجونو لپاره ښوونځي پرانیزي او یو ټولشموله حکومت جوړ کړي.
خو ها خوا بیا ټي ټي پي خپلو وسله والو کسانو ته امر کړی چې د پاکستاني پوځ پر پوستو، کمپونو او کاروانونو خپلو وسله والو بریدونو ته زور ورکړي.
ټي ټي پي په ځینو تبادله شوو، پیغامونو کې وايي چې موږ وسلې نږدو او د پاکستان پر وړاندې به خپلې وسله والې مبارزې ته دوام ورکوي.
پي ټي اېم او د پښتنو قامي عدالت جرګې دا پرېکړه کړې چې د پوځ په ګډون به وسله وال هم له پښتونخوا وځي.
