طالبانو په خوست ولایت کې د غرغښت په نوم راډیو خپرونې بندې او دفتر یې ور تړلی دی
له خوست ولایت ځینې ځایي سرچینې وايي، طالبانو په دې ولایت کې د غرغښت په نامه د راډیو خپرونې تړلي او د خپرېدو اجازه نه ورکوي.
په خوست کې ځايي وویل، چې طالبانو د غرغښت په نامه یوه سیمه ایزه راډیو تړلې ده. سرچینې وايي، چې طالبانو دغه راډيو د خپرونو په زګنالونو کې د موسیقۍ د شتون له امله تړې ده.
په خوست کې ځايي سرچینو نن جعمه (د لړم۱۱مه) ویلي، چې طالبانو تېره ورځ ماسپښین درې بجې د غرغښت سیمه ایزې راډیو نشرات قطع کړي او د دروازه یې ورته مهرلاک کړې ده.
د راډیو په تړلو کې چا حضور دردلود؟
د ترلاسه شو معلوماتو پربنسټ په خوست کې د طالبانو د امربالمعروف، استخبارات او اطلاعاتو فرهنګ ریاستونو غړو په حضور کې دغه راډیو تړل شوې ده.
د غرغښت راډيو او د رسنیو نورو سیمه ایزو بنسټونو تر اوسه کوم رسمي غبرګون نه دی ښودلی او نه هم طالبانو څه ویلي دي.
نور ولولئ: د راډیو نړیواله ورځ؛ افغانستان کې راډیویي خپرونې ولې بې کیفیته دي؟
نور ولولئ: طالبانو په بدخشان کې د ښځو غږ راډیو خپرونې بندې کړې دي
په خوست کې ځینو ځايي خبریالانو افغانستان انټرنشنل ته وویل، چې نن د جعمې ورځ «د لړم۱۱مه» د طالبانو د خوست په اطلاعاتو او فرهنګ ریاست کې د ځايي رسنیو له استازو سره غونډه کړې ده.
په دې ناسته کې د طالبانو د اطلاعاتو او فرهنک او امربالمعروف ریاستونو مسوولاتو د رسنیو استازو ته خبرداری ورکړی چې د امربالمعروف د قانونو د پلي کېدو او په راډيوګانو کې موسیقۍ غږول په مکمل ډول بند دي.
د غرغښت راډیو له برخلیک سره مخامخ کېدل
ځینو خبریالانو چې په دې ناسته کې یې کډون کړی وو، وايي، چې طالبانو ورته جدي ګواښ کړی چې په رسنیو کې د هر ډول موسیقۍ غږول بند دي او که دوی هم موسیقي خپره کړي د غرغښت راډيو له سرنوشت سره به مخ شي.
طالبانو د بیاځلي واک ته رسېدو سره سم د عامو خلکو ترڅنګ په رسنیو پراخ بندیزونه لګولي دي.
په ورته وخت کې د طالبانو د امربالمعروف وزارت هڅه کوي، چې په ټول افغانستان کې د ساکښو موجوداتو د انځورونو پر خپرېدو خپل بندیز عملي کړي.
د رسنیو ملاتړو بنسټونو د طالبانو دا کار، په ټول هېواد کې د انځوریزو رسنیو د بندېدو په مانا بولي.
دا مهال په خوست کې د طالبانو تر واکمنۍ لاندې پر ملي راډيو او تلويزيون سربېره ١٥ خصوصي راډيوګانې او درې خصوصي ټلويزيونونه فعاليت کوي.
پر دې سربېره، خبریالان وايي، طالبانو ددوی پر وړاندې معلوماتو ته د لاس رسي سرچینې محدودې کړې او ورځ تر بلې ورباندې کړۍ راتنګوي تر څو د دندې پرېښودلو ته اړ ویستل شي.
