د طالبانو تر کنټرول لاندې مخابراتو وزارت وايي، ژر به د فیسبوک ټولنیزه شبکه افغانستان کې وتړي
فیسبوک هغه ټولنیزه رسنۍ ده چې افغانستان کې تر ټولو ډېر کاروونکي لري، خو طالبان وايي، ددغه ټولنیزې شبکې د محدودولو یا تړلو تګلاره یې نهايي کړي ده.
د طالبانو د مخابراتو او ټېکنالوجۍ وزیر اعلان وکړ، چې وزارت یې د فېسبوک په ګډون د ځینو ټولنیزو شبکو د محدودولو یا په بشپړه توګه د بندولو تګلاره نهايي کړي ده.
د فیسبوک د تړلو لپاره د طالبانو منطق
نجیب الله مهاجر زیاته کړه، چې د ځوانانو د “وخت او پیسو د مصرفولو” او “غیر اخلاقي مسالو” لیدلو لپاره یې فېسبوک بند کړی.
هغه له طلوع نیوز سره په مرکه کې وویل: «زموږ ځوانان په داسې حال کې دي چې له علمي پلوه کمزوري دي او اکثریت یې نالوستي دي او خپل وخت او پیسې په دې شیانو (ټولنیزو شبکو) ضایع کوي، چې د شرکت په ګټه او د ملت په زیان دي.»
نور ولولئ: د میټا شرکت مشر زوکربرګ ویلي د ۱۰ زره کارکوونکو دندې ختموي
نور ولولئ: د فیسبوک او ټویټر مشران په قفس کې سیالي کوي
نور ولولئ: د حماس-اسراییل د جګړې له امله میټا شرکت فیسبوک کې بدلون راولي
که څه هم دغه طالب چارواکي څرګنده نه کړه، چې دا تګلاره به کله عملي کېږي؛ خو ویې ویل چې د دې مسالې د مخنیوي لپاره د مخابراتو او ټکنالوجۍ وزارت په افغانستان کې د فېسبوک د بندولو تګلاره جوړه کړې ده.
د طالبانو د مخابراتو او ټکنالوجۍ وزیر ټینګار کړی، چې افغان ځوانان زده کړو ته اړتیا لري او باید خپل وخت په ټولنیزو شبکو تېر نه کړي.
د نورو ټولنیزو رسنیو د تړلو ګواښ
څه موده وړاندې د طالبانو مشر ملا هبت الله اخوندزاده د دې ډلې کابینې ته امر وکړ، چې د فېسبوک بندولو پر پلان له سره کتنه وکړي.
په یوه بل اقدام کې د طالبانو کابینې د مخابراتو او ټکنالوجۍ وزارت ته دنده وسپارله چې ځینې نور سایټونه او چینلونه لکه ټیک ټیک او پابجي بند کړي.
د طالبانو کابینې ویلي، چې د پابجي او ټیک ټاک لوبې “ځوانان ګمراه کوي” او باید منع شي.
په افغانستان کې د فېسبوک د بندولو هڅې کوي، چې د فېسبوک مالک “میټا” شرکت د امریکا د “ترهګرۍ سره د مبارزې” د قوانینو پر بنسټ د دولتي ادارو او د طالبانو د ځینو غړو د کاروونکو اکاونټونه بند کړي دي.
میټا شرکت اجازه نه ورکوي چې له فیسبوک د طالبانو په ګټه تبلیغات وشي. طالبانو په فیسبوک کې په داسې نومونو اکاونټونه جوړ کړي چې میټا شرکت ورباندې د طالبانو او یا د هغو د ملاتړو شک ونه کړي او اکاونټونه یې مسدود نه کړي.
