م.م کې د افغانستان دایمي استازی وايي، د طالبانو سیاستونه د افغانانو د کلتور او اسلامي ارزښتونو خلاف دي

په ملګرو ملتونو کې د افغانستان دایمي استازي نصیراحمد فایق د دغه سازمان د امنیت شورا د سولې او ښځو په هکله جوړه شوې غونډه کې ویلي چې د طالبانو سیاستونه د افغان ولس له اسلامي ارزښتونو او کلتور سره سمون نه لري.

فایق شنبه د لړم پر ۵مه د اېکس‌پاڼې له لارې د خپلې وینا په خپاره شوي متن کې ویلي چې طالبانو د افغانستان د بشري حقونو له نړیوالو مکلفیتونو سرغړونه کړې ده.

هغه زیاته کړې چې افغانې ښځې او نجونې د طالبانو له خوا د تحمیل شوي جنسیتي اپارټایډ له کبله له شدید بشري ناورین سره مخ دي.

د ښځو له حقونو د طالبانو سرغړونه

په ملګرو ملتونو کې د افغانستان دایمي استازي په تېر جمهوري نظام کې د ښځو حقونو خوندیتوب ته په اشارې ویلي چې طالبانو د لږ تر لږه ۹۰ فرمانونو په صادرولو سره د ښځو له حقونو سرغړونه کړې ده.

نوموړي افغان ډیپلوماټ څرګنده کړې: «دا مسایل له جنسیت څخه بهر دي او له ملي ناورین سره د افغانستان د اقتصاد پر راتلونکي ژورې اغېزې رامنځته کوي.»

نور ولولئ: نصیر احمد فایق: پر ښځو د طالبانو بندیزونه هم جنسیتي اپارتاید او هم نسلي شاته تګ دی

نور ولولئ: نصیر احمد فایق د دوحې ۳مه ناسته کې د افغان مېرمنو د ګډون غوښتنه وکړه

همداراز د دې وينا په متن کې راغلي چې نړيواله ټولنه بايد د طالبانو له خوا د افغان ښځو د حقونو سرغړونې په تړاو بې پرې نه وي.

د طالبانو کړنې د جنسي اپارټاید په توګه په رسمیت پېژندنه

د فایق په وینا، ملګري ملتونه باید د طالبانو جنسيتي اپارټاید د بشریت پر وړاندې د یو جنایت په توګه په رسمیت وپېژني.

پر طالبانو فشار راوړل، د جنسیتي اپارټايډ رسمت پېژندنه، په افغانستان کې د سراسري سولې ټينګښت او د افغان ښځو د ملاتړ لپاره د مالي سرچینو تخصیص له نړیوالې ټولنې په ځانګړې توګه د ملګرو ملتونو امنیت شورا څخه د نصیراحمد فایق څو نورې غوښتنې دي.

دا په داسې حال کې ده چې تېره اوونۍ هم فایق د دغه سازمان د ۷۱مې عمومي اسامبلۍ د درېیمې کمېټې په غونډه کې ویلي و چې د طالبانو تر کنټرول لاندې افغانستان کې روان وضعیت د نړیوالې ټولنې پرېکنده، اصولي او متحدو اقداماتو ته اړتیا لري.

په ورته وخت کې طالبانو بیا پر ښځو لګول شوي بندیزونه د اسلام مبارک دین غوښتنه بللې، په داسې حال کې چې د نړۍ علماء کرام وايي، دا د دین غوښتنه نه ده.