د افغانستان په غزني ولایت کې د ګازو بخارۍ د یوې کورنۍ ۵ غړي چې درې په کې ماشومان دي، مړه کړي دي
د هر ژمي په رارسېدو له ګازي بخاریو سره د بې احتیاطۍ یا بې پامۍ له امله په ځینو سیمو کې خلک ددې پېښې قرباني کېږي چې تازه دا پېښه په غزني ولایت کې رامنځته شوې او د یوې کورنۍ ۵ غړي یې مړه کړي دي.
د غزني د طالبانو د اطلاعاتو او فرهنګ رياست د اطلاعاتو امر وایي، چې په دې پېښه کې د يوې کورنۍ د پلار او مور ترڅنګ درې ماشومان هم مړه شوي دي.
د ژمي رارسېدل او د خلکو نه عامه پوهای
د ګازي بخاریو د استعمال په تړاو د خلکو عامه پوهاوی لږ دی او همدا ناپوهاوی د دوی د مړینې سبب کېږي. تازه د هوا په سړېدو په ډېرو نورو ولايتونو کې هم ورته پېښي رامنځته شوي.
د غزني د طالبانو د اطلاعاتو امر منصور افغان وايي، چې د عبدالصبور په نوم دغه کس د خپلي مېرمنې او درېیو ماشومانو سره د ګازي بخارۍ له کبله مړه شوي دي.
نور ولولئ: د زلزلې پر مهال د ځان خوندي کولو لارې چارې
نور ولولئ: د هرات خونړۍ زلزله؛ طالبان زلزلهځپلیو ته پاخه کورونه جوړوي
نوموړي وايي؛ دغه پېښه د غزني د پنځمې ناحيې د غيب قلندر په سېمه کې په یوه کور کې رامنځته شوې، چې دغه کورنۍ اصلي د دې ولايت د ده یک ولسوالۍ اوسېدونکې ده.
د منصور افغان په خبره، چې دا ډول پېښې تېر کال هم په دې ولایت کې شوي؛ خو د ارقامو په اړه يې معلومات نه درلودل.
د سیمې چارواکي وايي چې عامه پوهاوی پیلوي
دغه طالب چارواکی وايي، ددې لپاره چې د دا ډول پېښو ګراف راټیټ شي، په دې برخه کې به د خلکو د پوهاوي لپاره کمپاينونه هم زيات او نورو سیمو ته وغځوي.
د يادوني وړ ده، چې د تېرې شبنې په ورځ د بدخشان ولایت د وردوج په ولسوالۍ کې د واده د مراسمو څو ساعته وروسته يوه نوې واده شوې مېرمن هم د ګازو د بخارۍ له کبله مړه شوې وه.
د هوا په سړېدو ډېری افغانې کورنۍ د کورنو د تودېدو لپاره له ګازي بخاريو څخه کار اخلي، چې زيات مهال له اطاقونو څخه د هوا وتلو د منظم سیسټم د نه شتون او د بې احتياطۍ له کبله له دا ډول پېښو سره مخ کېږي.
د یادونې وړ ده چې تېر کال په کابل کې د ګازي بخارۍ له امله د پوهنتون څلور محصلان هم مړه شوي و.
