په اسلاماباد کې د روسیې سفیر البرت خوریف ویلي، افغانستان هغه وخت پرمختګ کولی شي چې د نجونو او ښځو د زده کړو حق ته پکې درناوی وشي.
د روسیې سفیر دا څرګندونې له «TSR Podcast» سره په یوه مرکه کې کړې دي. هغه په پښتو ژبه ویلي چې بشري حقونه باید د نړۍ د ټولو حکومتونو له لوري رعایت شي او د افغانستان اوسني چارواکي هم باید دې موضوع ته جدي پاملرنه وکړي.
د روسیې سفیر د نجونو پر زده کړو ټینګار وکړ
البرت خوریف ویلي، د یوې ټولنې پرمختګ له زده کړو سره تړاو لري او که نجونې له تعلیمه محرومې پاتې شي، افغانستان به له ګڼو ستونزو سره مخ وي.
هغه ویلي:
«د ټولنې پرمختګ د زده کړو پرته ناشونی دی، په ځانګړي ډول د نجونو زده کړې ډېر اهمیت لري.»
د روسیې سفیر همداراز هیله ښودلې چې د افغانستان اوسنی حکومت د خلکو اساسي حقونو ته پاملرنه زیاته کړي.
د پاکستان امنیتي وضعیت هم د روسیې سفیر اندېښمن کړی
البرت خوریف د پاکستان د امنیتي وضعیت په اړه هم خبرې کړې دي. نوموړي ویلي، که څه هم اوس په اسلاماباد کې له خپلې کورنۍ سره ارام ژوند لري، خو د پاکستان امنیتي وضعیت هم ورو ورو د بدلون په حال کې دی.
هغه زیاته کړې چې ناامني د افغانستان پولې ته نږدې سیمو ته غځېدلې او دا وضعیت د اندېښنې وړ دی.
د روسیې سفیر پخوا په افغانستان کې د ډیپلومات په توګه دنده ترسره کړې او په پښتو او دري ژبو خبرې هم کولی شي.
د نجونو زده کړو موضوع لا هم د نړیوالو بحثونو برخه ده
طالبانو تر اوسه د شپږم ټولګي پورته د نجونو پر زده کړو بندیز لیرې کړی نه دی. په تېرو څو کلونو کې د ښځو پر زده کړو، کار او ټولنیز حضور ګڼ محدودیتونه لګول شوي دي.
نړیوالو سازمانونو او ګڼو هېوادونو څو ځله له طالبانو غوښتي چې د نجونو د زده کړو دروازې بېرته پرانیزي، خو تر اوسه په دې برخه کې عملي بدلون نه دی لیدل شوی.
