د طالبانو پرضد د شاوخوا ۳۰ ډلو ایتلاف جوړ شو
یو شمېر پخوانیو افغان مشرانو، چې له هیواده بهر اوسي، پرون (جمعه) په یوه انلاین یا مجازي غونډه کې د یوه نوي ايتلاف د جوړېدو اعلان وکړ.
د نجونو پر طبي زده کړو له وروستي بندیز وروسته د طالبانو پرضد په ترکیه کې د شاوخوا ۳۰ ډلو ایتلاف جوړ او خپل جوړښت یې اعلان کړ.
پخواني قوماندانان، تنظیمي مشران او سیاستوال لکه عبدالرشید دوستم، محمد اسماعیل خان، کریم خلیلي، محمد محقق، عبدالرب رسول سیاف، یونس قانوني، عطامحمد نور، صلاح الدین رباني، عبدالحق شفق، صادق مدبر، سرور دانش، احمد مسعود، رحمت الله نبیل، عمر داوودزی او تادین خان د دغه نوي ایتلاف عمده مشران دي.
دغه ایتلاف د څه شي په نوم دی؟
د افغانستان د ژغورنې لپاره د ملي شورا په نوم د دې نوې ټلوالې هدف د هېواد د روان بحران حل او د طالبانو د واکمنۍ مخالفت بلل شوی دی.
دوی په خپله مجازي غونډه کې وویل چې په خپل منځ کې به هڅې همغږي کړي، افغانستان به له اوسني کړکېچ څخه راوباسي، او د طالبانو د واکمنۍ پر وړاندې به یو ګډ دریځ وړاندې کړي.
نور ولولئ: امرالله صالح خپلو منتقدینو ته؛ د طالب ضد خوځښتونه پښتنو کې وو او دي
نور ولولئ: صالح: له مشرانو سره تر مشورې وروسته به امریکا ته د تګ په اړه پرېکړه کوي
دوی په دې اړه چې په څه ډول به د طالبانو اوسنۍ واکمني وننګوي، څه نه دي ویلي. دا په داسي حال کې ده چې تر دې وړاندې د دغو قوماندانانو او تنظیمي مشرانو اکثریت په ترکیه کې د افغانستان د مقاومت د عالي شورا په نوم یو تشکیل درلود.
تر ټولو پراخ ایتلاف
خو د افغانستان د ژغورنې لپاره ملي شورا وايي چې د دې نوي ایتلاف په جوړولو سره یې له ۲۰۲۱ څخه، چې طالبان بیا واک ته رسیدلي دي، د طالبانو د واکمنۍ په وړاندې تر ټولو مهم او پراخ ایتلاف رامنځته کړی دی.
د طالبانو افراطي او د ولس بېزاروونکو اقداماتو دې ډول ايتلافونو ته د پرمختګ لاره هواره کړې خو څرګنده نه ده چې کوم سیمه ییز او نړیوال قدرت به یې ترڅنګ ودریږي او که نه. د افغانستان د معادلو په بدلولو کې د بهرنیو هیوادونو رول ډېر اغېزمن بلل کېږي.
په دې ابتلاف کې لسګونه وړې ډلې برخه لري.
دا په داسې حال کې ده چې طالبانو په افغانستان کې د اوسنیو تګلارو په پلي کولو کې هېڅ ډول نرمښت نه دی ښوولی.
دغه ډله په افغانستان کې د پراخ بنسټه حکومت د جوړېدو اراده هم نه لري.
