نړۍ

ستولتنبرګ وايي د اوکراین واقعي ځای په ناټو کې دی

د ناټو مشر ينس ستولتنبرګ، کیف ته د خپل نااعلان شوي سفر په ترڅ کې وويل چې د اوکراین راتلونکی په ناټو کې دی. په ورته مهال کې مسکو ويلي دي چې د اوکراین د غړیتوب مخنیوی ورته د یو مهم هدف په توګه پر خپل ځای پاتې دی

دا پر اوکراین د روسېې تر پوځي یرغل وروسته چې ۱۴ میاشتې يې کیږي، کیف ته د ستولتنبرګ لومړی سفر دی. نوموړي په کیف کې د اوکراین له ولسمشر، ولودیمیر زيلنسکي سره د یو ګډ خبري کنفرانس پر مهال خبریالانو ته وويل: “اجازه راکړئ چې روښانه ېې کړم: د اوکراین حقيقي ځای په يورو-اتلانتيک کورنۍ کې دی. د اوکراین واقعي ځای په ناټو کې دی. د وخت په اوږدو کې زموږ ملاتړ به تاسو سره مرسته وکړي چې دغه څه ممکن شي.”

هغه ژمن شو چې د اوکراین پوځي ملاتړ ته به ادامه ورکوي او زیاته يې کړه چې د ناټو متحدينو تر اوسه په لسوګونو زره اوکرایني سرتيرو ته پوځي روزنې ورکړې او د ۶۵ ميليارده يورو په ارزښت پوځي مرستې ېې ورته برابرې کړې دي.

نور ولولئ: په روان ۲۰۲۳ ميلادي کال کې فنلنډ هېواد د ناټو غړی شو

ستولتنبرګ وويل په جولای میاشت کې د لیتوانیا په ویلنیوس ښار کې د ناټو سرمشريزې ته د زیلنسکي تر دعوت کولو مخکې، ناټو اوس او هر څومره وخت چې نيسي، ستاسو ترڅنګ ولاړه ده.

هغه زیاته کړه چې د ناټو په تړون کې د اوکراین د غړیتوب او دغه هېواد لپاره د امنیتي ضمانتونه موضوعات به د سرمشريزې د اجندا په سر کې ځای ولري.

نور ولولئ: ترکیې په ناټو سازمان کې د فنلډ غړیتوب تائید کړ

ستولتنبرګ دا هم وویل چې زیلنسکي سره د ناټو د ملاتړ پر یو پروګرام يې خبرې کړې دي. ترڅنګ ېې د ډنمارک او نیدرلند (هالند) هیوادونو د پنجشنبې ورځې اعلاميې ته اشاره وکړه چې دغه هیوادونه پلان لري د ۲۰۲۴م کال له پیل څخه به اوکراین ته ۱۴ نور ليوپارډ ۲ جنګي ټانکونه ورکړي.

د رومانیا په پلازمېنه بخارست کې د ناټو د ۲۰۰۸م کال په سرمشرېزه کې پر دې توافق وشو چې اوکراین به په نهایت کې د ناټو یو غړی کيږي

خو تر هغه وروسته په دې تړاو د رهبرانو له خوا داسې کوم جدي اقدامات چې وشي کړی دغه هیواد د ناټو غړیتوب ته ورنژدې کړي، ترسره نه کړل.

نور ولولئ: روسیې په خپل ګاونډیو هیوادونو کې د ناټو پر فعالیتونو د سختو بندیزونو غوښتنه کړې

د ناټو سرمنشي په اوکراین کې د روانې جګړې په هکله وويل: “موږ نه پوهيږو چې دغه جګړه به څه وخت پای ته رسيږي خو په دې پوهیږو چې د روسېې یرغل یوه زهرجنه نمونه ده چې باید ودرول شي.”

دا په داسې حال کې ده چې د کریملین ویاند، دیميتري پسکوف د سه شنبې په ورځ وویل چې د ناټو له غړیتوب څخه د اوکراین مخنیوی د مسکو له پاره د یو مهم هدف په توګه پر خپل ځای پاتې دی. هغه چې په یو خبري کنفرانس کې يې خبرې کولې، خبریالانو ته وویل چې د اوکراین الحاق به زموږ هیواد او زموږ د هیواد امنیت ته یو جدی او د پام وړ ګواښ وي.

افغان سالار

افغان سالار افغان سالار د لومړي لاس او کره معلومات تر تاسو درسوي. افغان سالار به تاسو ته د سیاست، ادب او کلتور، اقتصاد، روغتیا، سپورټ او نور په زړه پورې مطالب برابر او تر نورو به یې چټک درته وړاندې کوي.

اړوند خبرونه

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button