د امریکا ولسمشر ډونالډ ټرمپ له یو شمېر اسلامي هېوادونو غوښتي چې له اسراییلو سره د اړیکو عادي کولو لپاره د ابراهیمي تړون له بهیر سره یوځای شي. نوموړي ویلي، دا اقدام کولی شي په منځني ختیځ کې د نوو سیاسي او اقتصادي همکاریو لاره هواره کړي.
ټرمپ د دوشنبې په ورځ په خپلې ټولنیزې شبکې «ټروت سوشل» کې لیکلي چې ایران، سعودي عربستان، قطر، پاکستان، ترکیه او ځینې نور اسلامي هېوادونه باید د ابراهیمي تړون برخه شي. هغه زیاته کړې، که تهران له واشنګټن سره یوې هوکړې ته ورسېږي، نو امریکا به د ایران ګډون هم د دغه ایتلاف مهم پرمختګ وبولي.
له اسلامي هېوادونو د ټرمپ غوښتنه، د ایران او امریکا د خبرو یادونه
ټرمپ په خپلو څرګندونو کې ویلي چې له ایران سره روانې خبرې «مثبتې» روانې دي، خو نوموړي په دې اړه نور جزییات نه دي ورکړي چې دواړه لوري تر کومه بریده یوې احتمالي هوکړې ته نږدې شوي دي.
دا په داسې حال کې ده چې د واشنګټن او تهران ترمنځ د اړیکو وضعیت لا هم حساس بلل کېږي او دواړه هېوادونه د سیمې په ګڼو مسایلو کې اختلافات لري.
له اسلامي هېوادونو د ټرمپ غوښتنه، ابراهیمي تړون څه دی؟
ابراهیمي تړون په ۲۰۲۰ کال کې د ټرمپ د لومړۍ ولسمشرۍ دورې پر مهال پیل شو. د دې تړون له مخې متحده عربي امارات او بحرین لومړني عربي هېوادونه شول چې له اسراییلو سره یې رسمي اړیکې عادي کړې. وروسته مراکش او سوډان هم له دغه بهیر سره یوځای شول.
مصر او اردن تر دې وړاندې، کلونه مخکې له اسراییلو سره ډیپلوماټیکې اړیکې جوړې کړې وې، خو سعودي عربستان لا هم تر اوسه په رسمي ډول له اسراییلو سره د اړیکو عادي کولو ته نه دی چمتو شوی.
له اسلامي هېوادونو د ټرمپ غوښتنه، د سیمې حساس وضعیت
له اسلامي هېوادونو د ټرمپ غوښتنه داسې مهال مطرح کېږي چې د غزې جګړې او د منځني ختیځ وروستیو کړکېچونو د اسراییلو او عربي هېوادونو اړیکې یو ځل بیا له فشار سره مخ کړې دي.
یو شمېر شنونکي باور لري چې واشنګټن هڅه کوي د ابراهیمي تړون د پراخولو له لارې په سیمه کې نوی سیاسي ایتلاف رامنځته کړي، خو د فلسطین مسئله لا هم د ډېرو اسلامي هېوادونو لپاره اساسي خنډ ګڼل کېږي.
