سږ کال دوبي کې په کابل کې د ګرمۍ ترڅنګ د چاپېریال ککړتیا اوج ته رسېدلې دي
سږ کال دوبي کې د ګرمۍ کچه د تېرو کلونو په پرتله لوړه وه. د کابل اوسېدونکي سږ کال له سختې ګرمۍ شکایت کوي او وايي چې سږ کال ګرمي کې د کابل چاپیریال هم ککړ دی او د ناروغیو کچه هم لوړه شوي ده.
په داسې حال کې چې د دوبي په موسم کې د تودوخې درجه لوړیږي، د افغانستان په پلازمینه کابل کې د هوا د ککړتیا ستونزه نوره هم زیاته شوې ده.
د تنفسي ناروغیو زیاتوالی
د پلازمېنې اوسېدونکي د ککړتیا له زیاتوالي او له امله یې د تنفسي ناروغیو له ډېروالي شکایت کوي. د زړو موټرو ترڅنګ د فوسیلي سونګ او حرارتي بریښنا کارول د کابل د هوا د ککړتیا اصلي عوامل بلل کیږي.
د کابل اوسېدونکی اسلم جان وايي:«په وروستیو ورځو کې د هوا ککړتیا ډېره شوې ده. اصلي لامل یې د زړو موټرو لوی شمیر دی چې په ښار کې ګرځي.»
نور ولولئ: ننګرهار پوهنتون کې د اقلیمي بدلون نړیوال کنفرانس پایلې
نور ولولئ: متحده عربي امارات باید اقلیمي او نورو بحرانونو سره مبارزې ته چمتوالی ولري
نور ولولئ: طالبان په ننګرهار کې د اقلیمي بدلون نړیوال کنفرانس جوړوي
نوید رحیمي، چې د کابل ښار یو بل اوسېدونکی دی هم په دې باور دی چې د ښاریانو له خوا د ټیټ کیفیت سون توکو او حرارتي برېښنا کارولو د هوا ککړتیا لا پسې زیاته کړې ده.
د ککړې هوا کچې راټیټول
د طالبانو تر واک لاندې د افغانستان د چاپېریال ساتنې ریاست مسوولانو هم اعلان کړی چې له ترافیک پولیسو او کابل ښاروالۍ سره په همغږۍ د هوا د ککړتیا کچه راټیټوي.
په دې برخه کې طالبانو ځینې اقدامات کړي هم دي، خو کارپوهان دغه اقدامات کافي نه بولي او ککړه هوا ورځ تر بلې ډېرېږي.
د دې ادارې مشر طوفان جبران وايي: «ترافيک پوليس په منظم ډول خپلې پوستې څاري او هغه موټرو معلوموي چې ککړتیا خپروي او د دې ترڅنګ د هغو خاوندانو ته خبرداری ورکوي.
خو د چاپېریال ساتنې کارپوهان په دې باور دي چې په کابل کې د هوا د ککړتیا د وضعیت د ښه کېدو لپاره باید نور جدي اقدامات وشي. د شنې فضا زیاتول، د لویو فابریکو کنټرول او د ښار په شاوخوا کې د شنه کمربند بیا ژوندی کول د دوی له وړاندیزونو څخه دي.
په کابل، جلال اباد، کندهار، هلمند، نیمروز او ځینو نورو ولایتونو کې خلک له ګرمې هوا شکایت کوي او وايي چې سږ کال دوبی د نورو کلونو په پرتله زیات ګرم دی او تر څنګ یې چاپیریال هم ککړ شوی دی.
