اړوند خبرونه:
ډاکټر عبدالله عبدالله: پر ایران د اسرائیلو بریدونه نامشروع دي
د ایران د پارلمان رئیس: پر اسراییل برید ‘غاښ ماتوونکی ځواب’ دی
امریکا د اسرائیل پر وړاندې د ایران ګواښونه جدي بللي
د ایران د اسلامي جمهوریت یوه جګپوړي پوځي چارواکي اعلان وکړ، چې تهران به د استوګنې سیمو باندې د اسراییلو د وروستیو بریدونو او د ملکي وګړو د وژنې په ځواب کې خپلو غچ اخیستونکو اقداماتو ته دوام ورکړي. هغه ټینګار وکړ چې اسلامي جمهوریت به د پوځي قوماندانانو په له لاسه ورکولو سره کمزوری نه شي.
د ایران د وسلهوالو ځواکونو د لوی درستیز ویاند ابوالفضل شکارچي نن (شنبه، د جون ۱۴مه) له کورنیو رسنیو سره په یوه مرکه کې اعلان وکړ، چې د هغه هیواد پوځي ځواب چې هغه یې “د اسراییلو تېري” بولي، دوام لري، او ویې ویل: “اسلامي جمهوریت به خپل عملیات تر هغه وخته ودروي تر څو چې اسراییل په خپلو کړنو پښیمانه نه وي.”
هغه د اسراییلو پر پوستو د ایران د بې پیلوټه الوتکو بریدونو ته په اشارې سره ټینګار وکړ چې دا اقدامات د هغو بریدونو په ځواب کې دي چې د هغه په وینا په استوګنیزو سیمو کې د ښځو او ماشومانو د پام وړ شمېر د مړینې لامل شوي دي.
شکارچي دا هم وویل چې د هېواد د لوړ پوړو پوځي قوماندانانو وژنه به د اسلامي جمهوریت دفاعي وړتیاوې اغیزمنې نه کړي. د هغه په وینا، بدیل ځواکونه به د “قوي ارادې” سره د پخوانیو قوماندانانو لاره ته دوام ورکړي.
مخکې خپاره شوي راپورونه ښیي چې د ایران په خاوره کې د اسراییلو د بریدونو په ترڅ کې د انقلابي ګارد او د هغې د فضايي ځواک د قوماندانانو په ګډون لږ تر لږه ۲۰ لوړ پوړي قوماندانان وژل شوي دي.
په وروستیو اوونیو کې د ایران او اسراییلو ترمنځ تاوتریخوالی په بې ساري ډول زیات شوی دی. د دواړو خواوو له خوا متقابل بریدونو په سیمه کې د شخړې د خپرېدو په اړه اندیښنې راپورته کړي دي. د ایران د بې پیلوټه الوتکو د بریدونو په ځواب کې، اسراییلو د ایران دننه ځینې سیمې په نښه کړې، چې په پایله کې یې انساني تلفات او پراخ زیانونه رامنځته شوي دي.
اسلامي جمهوریت وايي چې اسراییل به د دې کړنو په وړاندې “بې ځوابه” نه پریږدي او ټینګار کوي چې خپلې مقابلې ستراتیژۍ ته به دوام ورکړي.
